वेस्ट इन्डिजसँगको क्रिकेट सिरिज खेल्नको लागि नेपाली राष्ट्रिय क्रिकेट टिम असोज ६ गते युएईको लागि प्रस्थान गर्ने भएको छ। टिम यस अघि नै युएई प्रस्थान गर्ने तयारी गरेकोमा भिसा नआउँदा खेलाडी नेपालमै रोकिएका थिए भने प्रशिक्षक पुगिसकेका थिए।
अब भने सबै खेलाडीको भिसा आईसकेकोले नेपाली खेलाडीहरु ६ गते युएई प्रस्थान गर्ने नेपाल क्रिकेट संघ क्यानका प्रवक्ता छुम्बी लामाले जानकारी दिए।
नेपाल र वेस्ट इन्डिजबीच टी-२० अन्तर्राष्ट्रिय शृङ्खला हुन लागेको हो। यो तीन खेलको शृङ्खला संयुक्त अरब इमिरेट्सको शारजाह क्रिकेट स्टेडियममा सेप्टेम्बर २७, २९ र ३० तारिखमा आयोजना हुने छ।
यो शृङ्खला नेपालका लागि आईसीसी पुरुष टी-२० विश्वकप एसिया क्वालिफायरको तयारीको रूपमा महत्वपूर्ण छ, जसमा नौ टिमबीच तीन स्थानका लागि प्रतिस्पर्धा हुने छ। वेस्ट इन्डिजका लागि भने यो २०२६ टी-२० विश्वकपअघिको फाइन ट्युनिङको अवसर बन्नेछ।
नेपालले पहिलो पटक टेस्ट राष्ट्रसँग सिरिज खेल्न लागेको हो ।
