१७औं संस्करणको नाडा अटोमा प्रदर्शनमा राखिन लागेको उड्ने कार काठमाडौँ आईपुगेको छ । सबै अवरोध, चुनौती र प्राकृतिक विपद् पार गर्दै असम्भवलाई सम्भव बनाइएको नाडाले जनाएको छ।
नाडा अटोमोबाइल्स एशोसिएसन अफ नेपालले साउन २०८२ तातोपानी क्षेत्रमा देखिएका प्राकृतिक विपद् र अनपेक्षित चुनौतीहरूलाई पार गर्दै भविष्यको मोबिलिटी प्रतीक डिपाल eVTOL फ्लाइङ ट्याक्सी र अत्याधुनिक युनिट्री रोबोट्स अब सुरक्षित रूपमा काठमाडौं आइपुगेको घोषणा गरेको हो । बाढीले नाका बन्द भएपछि यसलाई बोकेर भन्सार कार्यालयसम्म ल्याईएको थियो।
नाडाका अनुसार यी अति उच्च प्रविधिहरू पहिलोपटक नेपालमा सार्वजनिक प्रदर्शनको लागि तयार छन् र यस ऐतिहासिक क्षणलाई नाडा अटो शो २०२५ मार्फत दर्शकहरूले प्रत्यक्ष अनुभव गर्नेछन् । नाडाले भनेको छ ‘१७औं संस्करणको नाडा अटो शो केवल एउटा प्रदर्शनी मात्र होइन, यो हाम्रो देशको दृढता, नवीनता र भविष्यप्रतिको दृष्टिकोणको जीवन्त प्रमाण हो । यसले नेपालमा प्रविधिको नयाँ सम्भावनालाई उद्घाटन गर्नेछ ।’
२०८२ भदौ ३ गतेदेखि ८ गतेसम्म ( १५ – २४ अगस्ट २०२५) काठमाडौंको भृकुटीमण्डप प्रदर्शनी हलमा हुने यस ठुलो प्रदर्शनीमा सहभागी भई यो ऐतिहासिक क्षणका साक्षी बन्न समेत नाडाले आग्रह गरेको छ।
