समृद्धि फाइनान्सले आर्थिक वर्ष २०८१/८२ को चौथो त्रैमासको वित्तीय विवरण प्रकाशन गरेको छ। प्रकाशित विवरण अनुसार आर्थिक वर्ष २०८१/८२ मा कम्पनीले ३ करोड १९ लाख ३५ हजार रुपैयाँ खुद नाफा कमाएको छ। अघिल्लो आर्थिक वर्षको यसै अवधिमा कम्पनीको १३ करोड ६१ लाख खुद घाटामा थियो। आर्थिक वर्ष ७८/७९ पछि कम्पनी पहिलो पटक नाफामा गएको हो ।
समीक्षा अवधिमा कम्पनीको खुद ब्याज आम्दानी ९.१९ प्रतिशतले बढेर ८ करोड ८५ लाख कायम भएको छ। कम्पनीको खुद फि तथा कमिशन आम्दानी ७१ लाख ७ हजारबाट बढेर १ करोड ५२ लाख पुगेको छ ।
यस अवधिमा कम्पनीले सम्भावित जोखिमको लागि छुट्याएको इम्पेयरमेन्ट चार्ज अन्तर्गतको २ करोड ३९ लाख रकम रिभर्स भएको छ । इम्पेयरमेन्ट चार्ज रिभर्स हुँदा, र कम्पनीको खुद ब्याज आम्दानी सहित अन्य आम्दानी बढेको कारण कम्पनी नाफामा गएको देखिन्छ। कम्पनीको संचालन नाफा १ करोड ९५ लाख पुगेको छ।
यस अवधिमा कम्पनीको वितरणयोय मुनाफा भने ६२ करोड ५१ लाख रुपैयाँ ऋणात्मक रहेको छ। वितरणयोग्य नाफा ऋणात्मक रहेको कारण कम्पनीले लाभांश दिन सक्ने छैन ।
कम्पनीको चुक्ता पुंजी ८१ करोड ८९ लाख रुपैयाँ रहेको छ भने रिजर्भमा २९ करोड ५१ लाख रहेको छ। कम्पनीले यस अवधिसम्ममा २ अर्ब ७८ करोड निक्षेप संकलन गरेको छ भने १ अर्ब ८३ करोड कर्जा लगानी गरेको छ।
समीक्षा अवधिमा कम्पनीको प्रति शेयर आम्दानी ३.९० रुपैयाँ रहेको छ भने कम्पनीको प्रति शेयर नेटवर्थ ६२.११ रुपैयाँ रहेको छ। कम्पनीको खराब कर्जा २०.२३ प्रतिशतबाट घटेर ९.६६ प्रतिशत कायम भएको छ।
