नाडा अटोमोबाइल्स एसोसियशन अफ नेपालको आयोजनामा हुने ‘नाडा अटो शो’मा १०० भन्दा बढी स्टल रहने भएका छन् । भदौ ३ देखि ८ गतेसम्म भृकुटीमण्डपमा आयोजना हुने अटो शोमा १०० भन्दा बढी स्टल रहने टुङ्गो लागेको अटो शोका संयोजक अनुप बरालले जानकारी दिए ।
चार पाङ्ग्रे, दुइ पाङ्ग्रे, लाइट कमर्सियल भेहिकल, कम्पोनेन्ट, बैंक तथा इन्स्योरेन्स कम्पनी लगायतका स्टल रहने छन् । केही कम्पनीले आफ्ना नयाँ मोडलसमेत नाडा अटो शोको अवसरमा लन्च गर्ने भएका छन् ।
उनका अनुसार अहिले स्टल बाँडफाँड पश्चात आन्तरिक र डिजाइनको तयारीमा नाडा जुटेको छ । अब केही दिन पछि पत्रकार सम्मेलनको आयोजना गरेर अटो शो सम्बन्धि विस्तृत जानकारी दिइने संयोजक बरालको भनाइ छ ।
यस संस्करणको अटो शोको मुख्य प्रायोजकमा एमएडब्ल्यू ग्रुप अफ कम्पनीज् रहेको छ । डिजिटल टिकेट पार्टनरमा खल्ती रहने छ । नाडा अटो शोमा ‘मेड इन नेपाल पेभेलियन’, अटो डायलग (नीति र प्रवृत्ति सम्बन्धी संवाद), इटेरी, क्याफे जस्ता विशेष आकर्षणहरु रहने छन् ।
‘नाडाको गरिमा कायम रहने गरी नाडा अटो शो हुन्छ, विगतको जस्तै बृहत्त हुने कुरामा कुनै शंका छैन’ संयोजक बरालले भने, ‘विगतदेखि नै नेपालको ठूलो र बृहत अटो शोका रुपमा परिचित नाडा अटो शो यसपटक पनि त्यो प्रतिष्ठा र गरिमा कायम रहने गरी आयोजना हुन्छ ।’
