सुनसरी जिल्लाबाट फैलिएको पछिल्लो तनावका कारण निजी क्षेत्र चिन्तित भएको छ । नेपाल उद्योग वाणिज्य महासंघले सुनसरी लगायत तराईका विभिन्न जिल्लाहरूमा देखा परेका अशान्त वातावरण, श्रृङ्खलावद्ध घटना तथा सर्वसाधारणबीच उत्पन्न तनावप्रति चिन्ता प्रकट गरेको हो ।
नेपाल सदियौँदेखि बहुजातीय, बहुभाषिक, बहुधार्मिक र बहुसांस्कृतिक एकताको अनुपम उदाहरण रहँदै आएको स्मरण गराउँदै महासंघले तराई क्षेत्र जातजाति, भाषाभाषी र समुदायहरूबीचको आपसी भाइचारा, सामाजिक सद्भाव र सहिष्णुताको केन्द्र भएको जनाएको छ ।
सामाजिक अशान्ति, झडप, हिंसा र मुठभेडले कसैको पनि हित नगर्ने भन्दै महासंघले यस्ता घटनाले सामाजिक सद्भाव बिथोल्नुका साथै सर्वसाधारणको दैनिक जीवनयापन, उद्योग, व्यापार र समग्र देशको आर्थिक गतिविधिमा समेत गम्भीर नकारात्मक असर पुर्याउनेतर्फ सबैलाई सचेत गराएको छ । महासंघले सामाजिक सद्भाव र शान्ति नै मुलुकको समृद्धि र आर्थिक विकासको पूर्वसर्त भएको पनि जनाएको छ ।
महासंघका कार्यबाहक अध्यक्ष सुरकृष्ण वैद्यले एक विज्ञप्ति जारी गर्दै मतभेद वा असमझदारीलाई शान्तिपूर्ण वार्ता, सम्वाद र आपसी समझदारीबाट मात्र समाधान गर्न सकिने भन्दै शान्ति सुरक्षाको पूर्ण प्रत्याभूति दिलाउन स्थानीय प्रशासन र सरकारसँग माग गरेका छन् ।
साथै, कुनै पनि किसिमका भ्रम, उत्तेजना र अफवाहबाट मुक्त भई संयमता अपनाउन र परापूर्वकालदेखि कायम रहँदै आएको भाइचारालाई अझ मजबुत बनाउन पनि महासंघले अपिल गरेको छ । यस्तै, वर्तमान तनावपूर्ण स्थितिलाई साम्य पारी दिगो शान्ति स्थापना गर्न सकारात्मक र नेतृत्वदायी भूमिका निर्वाह गर्न राजनीतिक दल, नागरिक समाज, धार्मिक गुरुहरू, सञ्चारकर्मी तथा स्थानीय अगुवाहरूसँग महासंघले अनुरोध पनि गरेको छ ।
