नेपाल उद्योग वाणिज्य महासंघको वरिष्ठ उपाध्यक्ष र कोषाध्यक्ष चयनको प्रक्रियाविरुद्ध दायर भएको मुद्दामा उच्च अदालत पाटनले दुबै पक्षलाई बोलाएको छ । हेमराज ढकाल, किशोर प्रधान, नरेन्द्र खड्का र प्रल्हाद दाहालले सोमबार दायर गरेको रिटमा अदालतले बुधबार सुनुवाई गर्दै दूबै पक्षलाई बिहिबार बोलाएको हो ।
रिट निवेदनकर्ता मध्येका एक जनाले अदालतबाट कारण देखाउ आदेश भएको र अन्तरिम आदेश दिने कि नदिने भन्नेबारे छलफल गर्नको लागि दुवै पक्षको लागि बोलाएको जानकारी दिए । आज उच्च अदालतका न्यायाधीश श्रीधरा कुमारी पुडासैनीको एकल इजलाशमा यस मुद्दाको सुनुवाई भएको थियो ।
महासंघले वरिष्ठ उपाध्यक्ष र कोषाध्यक्षको चयन आगामी शुक्रबार गर्ने निर्णय गरेको छ । त्यसअघि शुक्रबार बिहान ९ बजे केन्द्रीय कार्यसमितिको बैठक बोलाइएको छ ।
वरिष्ठ उपाध्यक्ष र कोषाध्यक्षका आकांक्षीहरुलाई मनोनय दर्ताको समय पनि सोही दिनलाई तोकिएको छ । यसअघि बैशाख २१ र २२ गते महासंघको ६० औँ साधारणसभा तथा निर्वाचन सम्पन्न भइसकेको छ । महासंघको विधानमा वरिष्ठ उपाध्यक्ष र कोषाध्यक्ष कार्यसमितिले चयन गर्ने प्रावधान छ ।
