नेकपा एमालेका अध्यक्ष केपी शर्मा ओली आज चौथो पटक प्रधानमन्त्रीमा नियुक्त हुँदैछन् । राष्ट्रपति रामचन्द्र पौडेलले ओलीलाई आज साँझ प्रधामन्त्रीमा नियुक्त गर्ने तयारी गरेका छन् ।
नयाँ सरकार गठनका लागि राष्ट्रपतिबाट दाबी पेश गर्न तोकिएको समयसीमा आज साँझ ५ बजे सकिँदैछ । तोकिएको समयसीमा सकिएपछि प्रधानमन्त्रीको नियुक्ति र सपथको प्रक्रिया अघि बढ्नेछ । सोमबार बिहान ११ बजे सपथ ग्रहण गराउने तयारी राष्ट्रपतिको कार्यालयले गरेको छ ।
प्रधानमन्त्रीसँगै मन्त्रीहरुको पनि सपथ गराउने गरि सत्ता साझेदार दल नेपाली कांग्रेस र नेकपा एमालेले आन्तरिक तयारीलाई तीव्रता दिएका छन् । अहिले दुइ दल मन्त्री छान्नका लागि आन्तरिक छलफलमा छन् । कांग्रेसले १० र एमालेले ९ मन्त्रालयले लिने सहमति भएको बताइएको छ ।
हालसम्म कांग्रेस र एमालेबाहेक जनता समाजवादी पार्टी, लोकतान्त्रिक समाजवादी पार्टी नेपाल, जनमत पार्टी र नागरिक उन्मुक्ति पार्टी ओली नेतृत्वको नयाँ सरकारमा सहभागी हुने निश्चित भएको छ । राष्ट्रिय प्रजातन्त्र पार्टी र जनता समाजवादी पार्टी नेपाल सरकारमा सहभागी हुने वा नहुने भन्ने यकिन भइसकेको छैन ।
साथै, कांग्रेस र एमालेले मन्त्रालयको संख्याको भागबण्डा टुङ्गो लगाएपनि कुन मन्त्रालय कुन दलले लिने भन्ने अझै तय भइसकेको छैन । तर, अर्थमन्त्रालय एमालेले र परराष्ट्र मन्त्रालयले कांग्रेसले लिने करिब निश्चित भइसकेको बताइएको छ ।
बताइए अनुसार कांग्रेसका तर्फबाट डा. आरजु राणा देउवा परराष्ट्रमन्त्री बन्ने निश्चित जस्तै छ । कांग्रेसका प्रमुख सचेतक रमेश लेखकलाई गृहमन्त्री बनाउन लागिएको बुझिएको छ । कांग्रेसको तर्फबाट रक्षा मन्त्रालयसहित प्रकाशमान सिहंले सरकारमा जाने मन्त्रीहरुको नेतृत्व गर्ने सम्भावना छ । तर, उनले रक्षा नभई भौतिक पूर्वाधार मन्त्रालय खोजेको बताइन्छ । यदि, सिंहले रक्षा मन्त्रालय लिँदै कांग्रेसको तर्फबाट नेतृत्व गरेर नगए विमलेन्द्र निधिको नेतृत्वमा कांग्रेस सरकारमा जाने देखिएको स्रोतले बताएको छ ।
एमालेबाट उपाध्यक्ष विष्णुप्रसाद पौडेल उपप्रधानसहित अर्थमन्त्री बन्ने सम्भावना बलियो रहेको बताइन्छ । पौडेल अर्थमन्त्री बन्छन् भन्ने अपेक्षासहित शेयर लगानीकर्तामा उत्साह बढेकाले आफू नेतृत्वको सरकारबाट लगानीकर्तामा यो उत्साह कायम राख्न पनि ओलीले पौडेललाई अर्थमन्त्री बनाउने सम्भावना रहेको बताइएको छ ।
एमालेले लिने पक्का भएको सञ्चार तथा सूचना प्रविधि मन्त्रालयमा पदम गिरीको नाम पक्कापक्की जस्तै भएको बताइएकोछ ।
एमालेबाट मन्त्री बन्नेहरुको सूचीमा जुली कुमारी महतो र विद्या भट्टाराई लगायतको नाम चर्चामा छ ।
लोकतान्त्रिक समाजवादी पार्टीबाट सर्वेन्द्रनाथ शुक्ल वा शरदसिंह भण्डारी मन्त्री बन्दैछन् भने जनता समाजवादी पार्टीबाट प्रदीप यादव, नागरिक उन्मुक्तिबाट गंगाराम चौधरी र जनमत पार्टीबाट अब्दुल खान मन्त्री बन्ने सम्भावना रहेको बताइएको छ ।
