अब व्यावसायिक कारोबार बापतको रकम व्यक्तिगत खातामा जम्मा गर्न नपाइने भएको छ । आर्थिक विधेयक, २०८१ बाट आयकर ऐन, २०५८ को दफा ८१. थप भई व्यावसायिक कारोबार बापतको रकम व्यक्तिगत खातामा जम्मा गर्न नपाइने व्यवस्था भएको हो ।
आन्तरिक राजस्व विभागलले सार्वजनिक सूचना जारी गर्दै यस व्यवस्थाबारे जानकारी दिंदै यसको कार्यान्वयनको लागि आग्रह गरेको हो । नयाँ व्यवस्थामा भनिएको “कुनै पनि व्यक्तिले व्यावसायिक कारोबार बापत प्राप्त नगद, चेक, क्यू आर कोड तथा अन्य कुनै विद्युतीय माध्यमबाट प्राप्त हुने कुनै पनि रकम व्यक्तिगत बैंक खातामा जम्मा गर्न पाइने छैन । सोही ऐनको दफा ११९क. को उपदफा (३) मा दफा ८१क. को उल्लङ्घन गरेमा प्रत्येक पटकको अनुगमनमा पाँच हजार रुपैयाँ वा कुल रकमको दुई प्रतिशतमध्ये जुन बढी हुन्छ सो रकम शुल्क लाग्नेछ।”
सोही बमोजिमको कानूनी व्यवस्था सम्बन्धित करदाता एवं सरोकारवालामा विभागले जानकारी गराएको हो।
