नाडा अटोमोबाइल्स एसोसियसनका अध्यक्ष करण चौधरीले राष्ट्र बैंकले आर्थिक वर्ष २०८१/०८२ का लागि ल्याएको मौद्रिक नीतिले अटोमोबाइल्स व्यवसायीका एउटा पनि माग सम्बोधन नगरेको बताएका छन् । मौद्रिक नीतिबारे बिजनेश पानासँग कुराकानी गर्दै अध्यक्ष चौधरीले गत शुक्रबार नै आउँछ भनेको मौद्रिक नीति एक हप्ता ढिलो गरि आउँदा पनि कुनै माग सम्बोधन हुन नसकेको बताएका हुन् ।
‘एक हप्ता डिले (ढिलाई) हुँदा केही न केही आउँछ कि भन्ने आशा थियो, तर हप्तादिन ढिलाई गरेर ल्याइँदा पनि अटोमोबाइल्स व्यवसायका लागि कुनै पनि सकारात्मक कुरा आएनन्’ अध्यक्ष चौधरीले भने, ‘एउटा पनि माग सम्बोधन गरिएन, हाम्रो लागि त सकारात्मक भन्दा पनि नकारात्मक जस्तो देखियो ।’
उनका अनुसार अटोमोबाइल्स व्यवसायीहरु केन्द्रीय बैंकले ‘अटो लोन’को जोखिमभार १२५ प्रतिशतबाट घटाउँछ भन्नेमा आशावादी थिए । तर, राष्ट्र बैंकले यो पनि सम्बोधन नगरेको अध्यक्ष चौधरीको गुनासो छ ।
यसैगरि, कालोसूचीबारे केन्द्रीय बैंकले गरेको व्यवस्थाबारे पनि अझै प्रष्ट हुन आवश्यक रहेको उनको भनाइ छ ।
