मारुती सिमेन्ट्स लिमिटेडले आर्थिक २०२४/२५ को पहिलो ९ महिनामा झन्डै ४ अर्ब आम्दानी गरेको छ । यस अवधिमा कम्पनीले ३ अर्ब ९८ करोड ५० लाख आम्दानी गरेको हो।
अघिल्लो आर्थिक वर्षभर कम्पनीले ४ अर्ब ७५ करोड आम्दानी गरेको थियो भने त्यस अघिको आर्थिक वर्षमा ४ अर्ब ३३ करोड आम्दानी गरेको थियो। सिमेन्टको बिक्री बढेको र कम्पनीले खर्चमा मितव्ययिता अपनाएकोले कम्पनीको आम्दानी बढेको हो ।
कम्पनी आफैले क्लिंकर र ग्राइन्डिङ इकाइहरू संचालन गरेको छ, साथै एकलौटी चूना ढुङ्गा खानी चलाएको छ, जसले कम्पनीलाई प्रतिस्पर्धात्मक लाभ दिएको छ । कम्पनीले पीपीसी सिमेन्ट पनि उत्पादन गरेर व्यापार बढाउने योजना बनाएको छ।
कम्पनीले प्रति कित्ता ३७७ रुपैयाँमा १ करोड १६ लाख कित्ता शेयर निष्काशन गर्नको लागि नेपाल धितोपत्र बोर्डमा आवेदन दिएको छ। जसबाट कम्पनीले ४ अर्ब बढी रकम संकलन गर्ने छ। यसले कम्पनीको ऋण र इक्विटीको अनुपातमा सुधार ल्याउने छ।
हाल कम्पनीको चुक्ता पुँजी ३ अर्ब ६० करोड छ। आर्थिक वर्ष २०२२/२३ को अन्त्यमा कम्पनीको चुक्ता पुँजी ६० करोड मात्र थियो। कम्पनीले हकप्रद र बोनस शेयर मार्फत चुक्ता पुँजी बढाएको हो । कम्पनीको ऋण भने ५ अर्ब ६० करोड रहेको छ।
कम्पनीले आफ्नो उत्पादन नेपालभर बिक्री गर्ने भए पनि कम्पनीको मुख्य बजार भने नारायणघाटदेखि काँकडभिट्टा र नारायणघाटको उत्तरतर्फको रहेको छ, जहाँ २०० डिलर सञ्जाल छ। कम्पनीको स्थापित ब्रान्ड उपस्थिति र विशेषगरी पूर्वी क्षेत्रमा बलियो बजार स्थितिले वर्षौंदेखि प्रतिस्पर्धाबाट उत्पन्न हुने मूल्य अस्थिरतालाई सामना गर्न सहयोग गरेको छ। हाल, कम्पनीले “मारुति” ब्रान्ड नामअन्तर्गत केवल ओपीसी सिमेन्ट उत्पादन गरिरहेको छ। कम्पनीले आफ्नो उत्पादन दायरा विविधीकरण गर्न सुविधाहरूको विस्तारपछि पीपीसी सिमेन्ट उत्पादन गर्ने योजना बनाएको छ, जसले आगामी व्यापार सम्भावनाहरूका लागि सकारात्मक संकेत गर्छ।
कम्पनीसँग हाल झन्की खोला (कटारी) मा अवस्थित खानीको इजाजतपत्र छ, जहाँ करिब १४० मिलियन टन चूना ढुङ्गाको भण्डार अनुमान गरिएको छ। जसले कम्पनीलाई तीन दशकभन्दा बढी समयसम्म सञ्चालन गर्न पर्याप्त हुने अपेक्षा गरिएको छ। कम्पनीको उद्योग सिरहामा छ, जुन पूर्व-पश्चिम राजमार्ग र नजिकका प्रमुख शहरहरू र बजारहरूसँग राम्रोसँग जोडिएको छ। साथै अन्य क्लिंकर-आधारित सिमेन्ट उत्पादन कम्पनीहरूको उपस्थिति सीमित छ।
कम्पनीले क्लिंकर उत्पादन क्षमता प्रति दिन १,५०० मेट्रिक टनबाट बढाएर प्रति दिन ३,३०० मेट्रिक टन पुर्याएको छ। ग्राइन्डिङ इकाईको क्षमता प्रति दिन २,००० मेट्रिक टनबाट बढाएर ४,००० मेट्रिक टन बनाएको छ ।
कम्पनीले निर्वाध सञ्चालन सुनिश्चित गर्न लगभग एक वर्षको लागि चूना ढुङ्गा भण्डार राख्ने गरेको छ, भने सामान्यतया आफ्ना डिलरहरूलाई तीन महिनाको क्रेडिट अवधि प्रदान गर्छ ।
कम्पनीसँग सिमेन्ट उत्पादनमा १५ वर्षभन्दा बढीको सञ्चालन ट्र्याक रेकर्ड छ। यो कम्पनीमा राठी समूह र गोयल समूहका उद्योगपति र व्यापारीहरू आवद्द छन्। नन्द किशोर राठी कम्पनीका अध्यक्ष र सुनिल खेमका कम्पनीको प्रबन्ध निर्देशक छन्।
यद्यपि नेपाल विद्युत् प्राधिकरणले कम्पनीसँग डेडिकेटेड/ट्रंक लाइन शुल्क भन्दै थप ५७ करोड रुपैयाँ दाबी गरेको छ। जुन अहिले कानूनी प्रक्रियामा छ, तर कम्पनी विरुद्धमा कुनै प्रतिकूल निर्णय भएमा यसले कम्पनीलाई केही समस्या हुन सक्छ।
