आगामी माघ १ गतेदेखि बीमा सम्बन्धि कारोबारमा राष्ट्रिय परिचय पत्रको विवरण अनिवार्य भएको छ। नेपाल बीमा प्राधिकरणको असार १३ गतेको बैठकले यस्तो निर्णय गरेको हो ।
नेपाल सरकारबाट २०८१ असार १० मा नेपाल राजपत्र भाग ५ मा प्रकाशन भएको गृह मन्त्रालयको सूचनाको बुदाँ नम्बर (ख) मा बैकिङ तथा वित्तीय सेवा प्रवाहमा मिति २०८१/१०/०१ देखि राष्ट्रिय परिचयपत्र अनिवार्य गर्ने उल्लेख छ। सोहि व्यवस्था अनुसार आगामी माघ १ गतेदेखि बीमा सम्बन्धि कारोबारमा राष्ट्रिय परिचय पत्रको विवरण अनिवार्य हुने भएको हो।
प्राधिकरणले २०८१/१०/०१ देखि लागु हुने गरी नेपाली नागरिकको हकमा जारी हुने नयाँ बीमालेख, बीमालेखको नविकरण; बीमालेख ऋण, बीमालेख समर्पण, बीमा दाबी भुक्तानी लगायतका सबै किसिमका बीमा कारोबार र बीमा मध्यस्तकर्ताको दर्ता/नविकरणका साथै सेवा सुविधा भुक्तानीमा राष्ट्रिय परिचयपत्रको विवरण अनिवार्य गर्नको लागि सम्पूर्ण बीमा कम्पनीलाई परिपत्र जारी गरिसकेको छ।
यसको कार्यान्वयनका लागि बीमा कम्पनीले आवश्यक प्रचार-प्रसार, आन्तरिक कार्यविधि निर्माण; सम्बन्धित फाराम संशोधन लगायतका कार्यहरू तत्काल गर्न पनि प्राधिकरणले निर्देशन दिएको छ। नेपाली नागरिकताको प्रमाणपत्रको सट्टामा राष्ट्रिय परिचयपत्रको प्रमाणपत्र स्वीकार गर्ने पनि प्राधिकरणको परिपत्रमा उल्लेख छ।
