‘स्वास्थ्य र राष्ट्रका लागि एक सङ्कल्प’ भन्ने मन्त्रका साथ स्थापित ओम मेगा श्री फर्मास्युटिकल्स लिमिटेडले आफ्ना उत्पादन बजारमा ल्याएको दुइ वर्ष पूरा भएको छ । बजार प्रवेश गरेको दोस्रो वार्षिकोत्सवको अवसरमा कम्पनीले नेपाली औषधि उद्योगलाई गुणस्तर, पहुँच र विश्वासको नयाँ उचाइमा पुऱ्याउने लक्ष्यका साथ अघि बढिरहेको जनाएको छ ।
कम्पनीका अध्यक्ष अर्जुन कुमार श्रेष्ठले जीएमपी मार्गदर्शन र उच्च गुणस्तरीय उत्पादन प्रणालीलाई आफ्नो मूल आधार मानेर सुरक्षित, प्रभावकारी र सुलभ औषधि उत्पादनको प्रतिवद्धता दोहोर्याउँदै जनस्वास्थ्यमा भरोसा, उद्योगमा आत्मनिर्भरता र नेपाल निर्मित औषधिको प्रतिष्ठा निर्माणलाई केन्द्रमा राखेर काम गरिरहेको समेत उल्लेख गरेका छन् । उनले आगामी दिनमा उत्पादन, गुणस्तर प्रत्याभूति, बजार विस्तार र संस्थागत क्षमतामा थप लगानी गर्ने प्रतिवद्धता समेत जनाएका छन् ।
ओम मेगा श्री फर्मास्युटिकल्स सर्वसाधारण लगानीकर्तामा आईपीओ निष्काशन गरिसकेको कम्पनी हो । धितोपत्र बजारमा सूचीकृत रही ६० करोड रुपैयाँ चुक्ता पुँजीसहित चलिरहेको यस कम्पनीले लगानीकर्ताको विश्वास आर्जन गर्दै राष्ट्रका लागि आत्मनिर्भर औषधि उत्पादकको रुपमा अघि बढ्ने प्रण गरेको छ ।
कम्पनीले सेयरधनी, ग्राहक, चिकित्सक, वितरक, स्वास्थ्यकर्मी, नियामक निकाय, बैङ्क तथा वित्तीय साझेदार सबैमा धन्यवाद समेत ज्ञापन गरेको छ ।
यस कम्पनीमा गैरआवासीय नेपाली समेतको लगानी छ । कम्पनीको उत्पादन कारखाना चितवनको जुगेडीमा रहेको छ । कारखानाबाट विभिन्न प्रकारका औषधिहरु उत्पादन हुँदै आएका छन् ।
