अन्तर्राष्ट्रिय मुद्रा कोष (आईएमएफ)ले नेपालका लागि थप ४ करोड १३ लाख अमेरिकी डलर बराबरको ऋण स्वीकृत गरेको छ । आईएमएफको मंगलबार सम्पन्न कार्यकारी बोर्डले विस्तारित ऋण सुविधा (ईसीएफ) अन्तर्गतको चौथो किस्ता वापत ५ अर्ब ५० करोड नेपाली रुपैयाँ बराबरको ऋण रकम स्वीकृत गरेको हो ।
यस सँगै आईएमएफले नेपाललाई विस्तारित ऋण सुविधाअन्तर्गत स्वीकृत गरेको ऋण रकम २४ करोड ७७ लाख अमेरिकी डलर पुगेको छ ।
आईएमएफले ईसीएफ अन्तर्गतका कार्यक्रममा नेपालले राम्रो प्रगति गरेको उल्लेख गरेको छ । सावधानी अपनाउदै लागु गरिएको मौद्रिक नीति, पुँजीगत खर्चमा वृद्धि, जलविद्युत उत्पादनमा वृद्धि र पर्यटक आगमनमा वृद्धिले अर्थतन्त्र चलायमान बनेको आईएमएफले उल्लेख गरेको छ।
चालु आर्थिक वर्षमा नेपालको आर्थिक वृद्धिदर ३ प्रतिशत मात्र हुने र आगामी आर्थिक वर्ष आर्थिक वृद्धि दर बढेर ४.९ प्रतिशत पुग्ने आईएमएफको प्रक्षेपण छ। महँगी दर भने राष्ट्र बैंकले तोकेको ५.५ प्रतिशतको सीमा भन्दा कम नै हुने आईएमएफको प्रक्षेपण छ ।
