प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिमा सिमेन्ट उद्योगीहरुले पटक पटक बोलाएर आफूहरुलाई काम गर्न नदिइएको भन्दै आपत्ति जनाएका छन् । मंगलबारको समिति बैठकमा नेपाल सिमेन्ट उत्पादक संघका निवर्तमान ध्रुव थापाले आफूहरुलाई पटक पटक बोलाउने गरिएको भन्दै अब आइन्दा बोलाए नआउने बताएका हुन् ।
‘हामीलाई यहाँ पटक–पटक किन बोलाइन्छ ?’ उनले प्रश्न गर्दै भने, ‘हाम्रो काम उद्योग चलाउने हो, अब बोलाइयो भने हामी आउँदैनौं ।’
यसपछि समितिमा रहेका सांसदहरुले थापाले धम्कीपूर्ण भाषा प्रयोग गरेको भन्दै आपत्ति जनाए । सांसद सूर्यमान तामाङ दोङले उद्योगीहरुले धम्कीको भाषा बोलेको भन्दै आपत्ति जनाए । ‘तपाईहरुले विद्युत् प्राधिकरणको पैसा नतिरेको भन्ने आरोप छ । यसमा गुनासो छ भनेर तपाईंको कुरा सुन्न बोलाइएको हो’ उनले भने, ‘धम्की खान बोलाएका होइनौँ । आफ्ना कुरा लुकाउन लोडसेडिङ देखाउनु भएको छ । यो मान्य छैन ।’
समिति सदस्य रमा कोइराला पौडेलले पनि यो बैठक संसदीय समितिका सभापतिले बोलाएको हो कि व्यवसायीले बोलाएको हो भन्दै प्रश्न गरिन् । ‘प्रधानमन्त्रीलाई बोलाउँदा त आउनुपर्छ भने तपाईंले आउँदिनँ भन्न पाउनु हुन्न, राज्यले निजी क्षेत्रलाई पुल्पुल्याएको रहेछ । नत्र, उहाँहरूले धम्काउन सक्नुहुन्थेन’ उनले भनिन् ।
सदस्य पौडेलले सिमेन्टको भाउ बढाइएको विषयमा उजुरी आइरहेको र ति उजुरी उपर छलफल राखिने भन्दै छलफलमा आउँदिन भनेर उम्किन नपाइने बताइन् ।
सांसद लक्ष्मी महतो कोइरीले पनि सिमेन्ट उद्योगीमा धेरै अहंकार पलाएको बताए ।
