उद्योग, वाणिज्य तथा आपूर्तिमन्त्री दामोदर भण्डारीले जनप्रतिनिधिमा खुला अर्थतन्त्रबारे जानकारी कम हुँदा निजी क्षेत्रले गाली खाने परिस्थिति बनिरहेको टिप्पणी गरेका छन् । श्रम, रोजगार तथा सामाजिक सुरक्षा मन्त्रालयले आयोजना गरेको श्रम रोजगार सम्मेलनका क्रममा मन्त्री भण्डारीले जनप्रतिनिधिले खुला अर्थतन्त्रको बारेमा कम जानकारी राख्दा उद्योगी व्यवसायीहरुलाई तथानाम गाली गर्ने र बेइज्जती गर्ने काम भइरहेको बताएका हुन् ।
निजी क्षेत्रलाई तथानाम गाली गर्ने र बेइज्जती गर्ने काम जनप्रतिनिधिहरुबाटै हुने गरेको बताउँदै उनले जसका कारण निजी क्षेत्रको मनोबल केही मात्रामा गिरेको बताए । आत्मनिर्भर हुँदै निर्यात समेत सुरु गरिसकेको सिमेन्ट उद्योगले बजार मागअनुसारको मूल्य थपघट गर्दा सिण्डिकेटको आरोप लगाएर सांसदले नै जथाभावी बोलिदिँदा निजी क्षेत्रको मनोबल गिरेको मन्त्री भण्डारीको भनाइ छ ।
‘हामी जनप्रतिनिधिले सरकारको पक्ष र प्रतिपक्षमा रहँदाको बोलीमा फरक हुँदा निजी क्षेत्रले समस्या भोगिरहेको छ। जो जहाँ रहे पनि एउटै धारणा बनाएर अगाडि बढ्नुपर्छ’, उनले भने, ‘रोजगारी सिर्जना गर्ने प्रमुख निकाय नै निजी क्षेत्र हो, अहिलेको सरकारले निजी क्षेत्रको लगानीको पूर्ण सुरक्षाको ग्यारेन्टी लिने गरि काम गरिरहेको छ, यसतर्फ सरकार गम्भीर भएर लागेको छ ।’
