थकाली खानाका पारखीहरु स्वादिष्ट र स्थानीय परिकारको खोजीमा हुन्छन् । खासगरि, रैथाने थकाली खानका पारखीहरु काठमाडौँ उपत्यकामा त्यस्ता ठाउँहरुको खोजीमा रहन्छन् ।
अब स्थानीय र स्वादिष्ट थकाली खानाको परिकार उपलब्ध गराउने गरि बालुवाटारमा मेलुङ थकाली सञ्चालनमा आएको छ । मेलुङ दोलखाको गाउँपालिका हो । गाउँलाई शहरसँग जोड्दै गाउँकै उत्पादनलाई काठमाडौँसम्म ल्याएर शहरीया जनजीवनलाई रैथाने परिकार खुवाउने उदेश्यले वसन्त लामाले मेलुङ थकाली सञ्चालनमा ल्याएका हुन् ।
लामा आफैँ मेलुङबासी हुन् । उनकै नेतृत्वमा २ वर्ष अगाडी त्रिभुवन अन्तर्राष्ट्रिय विमानस्थलमा मेलुङ थकाली सञ्चालनमा आएको थियो । बालुवाटारमा खुलेको मेलुङ थकाली आठौँ आउटलेट हो ।
दोलखाको मेलुङ गाउँपालिका–३ घ्याङसुकाठोकरका लामा उक्त वडाको वडाध्यक्ष पनि हुन् । द बर्गर हाउस जन्माएर फ्रेन्चाइजमार्फत देशब्यापी बनाइरहेका उनले मेलुङ थकालीका आउटलेट भने आफैँले खोलिरहेका छन् । थकाली खानाका लागि प्रख्यात मुस्ताङको थकाली समुदायकै कुनै घर आँगनमा पुगेको जस्तो अनूभूति हुने गरि सबै डिजाइन गरिएको छ ।
आफ्नो गाउँ ठाउँलाई शहरमा ब्राण्डिङ गर्ने उदेश्यका साथ जन्मिएको मेलुङ थकालीका कोठाको नामाकरण पनि मेलुङ गाउँपालिकाको ७ वटै वडाको नामबाट गरिएको छ । सुकाठोकर, पवटी, घ्याङ, भेड्पु, डाडाखर्क, मेलुङ र विरौटा नाम राखिएको छ ।
मुस्ताङको थकाली समुदायको घरभित्र छिरेजस्तै अनूभूति हुने गरि दाउरा, ढुङ्गा र माने राखिएका छन् । दोलखाबाट ढुङ्गा ल्याएर बिच्छ्याइएको छ । हात धुने ठाउँमा ‘जोर धारा’ लेखिएको छ, जुन वसन्तको गाउँमा पर्छ । ढुङ्गाले कुँदेर संरचना बनाएर गाउँको झल्को दिने गरि नाम पनि जोर धारा राखिएको उनको भनाइ छ ।
माछा, बासमती चामल, गुन्द्रुक, भटमास, टिमुर, लगायतका भान्छामा चाहिने सामान दोलखाबाटै आउँछ । ‘तमाकोशीको माछा ल्याउँछौँ, अरु सामान पनि सकेसम्म उतैबाट ल्याउँछौँ, ढुङ्गा पनि दोलखा र काभ्रेबाट ल्याएका हौँ’ वसन्तले सुनाए । तामाकोशीको माछा र फापरको ढिडोलाई मेलुङ थकालीले विशेष परिकारका रुपमा राखेको छ ।
‘३ करोड लगानी मेलुङ थकालीमा बालबालिका खेल्ने ठाउँ पनि बनाइएको छ । इलेक्ट्रिक गाडीको चार्जिङ स्टेशन पनि राखिँदैछ । एकैपटक २५० जनालाई सेवा दिन सक्ने क्षमता मेलुङ थकालीमा छ ।
हालसम्म मेलुङ थकालीका आउटलेटहरु ८ वटा पुगेका छन् । एयरपोर्ट, शंखमुल, गठ्ठाघर, बनेपा, बौद्ध, अत्तरखेलमा सञ्चालनमा आइसकेको छ ।
‘यसको फ्रेन्चाइज माग हुन थालेको छ, तर हामीले काठमाडौँ उपत्यकाभित्र फ्रेन्चाइज नदिने नीति लिएका छौँ’ लामाले भने, ‘अब ८/९ महिना पछि अर्को आउटलेटको पनि प्लान बनाउँछौँ, ललितपूर एरियामा जाने सोच छ ।’
