नेपाल चेम्बर अफ कमर्सका निवर्तमान अध्यक्ष राजेन्द्र मल्लले स्थानीय तहहरुले निःशुल्क जमिन उपलब्ध गराएर सूचना प्रविधि क्षेत्रमा काम गरिरहेका जनशक्तिलाई ‘आईटी सेन्टर’ बनाउन आह्वान गर्नुपर्ने बताएका छन् । शंकरापूर महोत्सवमा सम्बोधन गर्दै निवर्तमान अध्यक्ष मल्लले स्थानीय तहहरुले १० वर्षसम्म जमिन निःशुल्क उपलब्ध गराउने हो भने नेपालका हरेक स्थानीय तहहरु आईटीको हब बन्ने बताएका हुन् ।
यस्तै, स्थानीय तह र सरकारले लिने करमा समेत छुट र सहुलियत प्रदान गर्ने हो भने नेपालको आईटी क्षेत्रले निकै फड्को मार्ने र विदेशी मुद्रा आर्जनको प्रमुख स्रोतका रुपमा विकास गर्ने उनको विश्वास छ । यसैगरी, कोही व्यक्तिले सफ्टवेयर कम्पनीलाई आफ्नो घर भाडामा लगाउँछ भने त्यस्तो घरको बहाल कर ५० प्रतिशत छुट दिएर पनि प्रोत्साहन गर्न सकिने मल्ल बताउँछन् ।
यस्तै, उनले युवा र विद्यार्थीलाई ‘पार्ट टाइम’को अवसर र अभ्यास गराउनुपर्ने समेत बताएका छन् । यसले विद्यार्थीहरुमा पढाई सँगसँगै सीप र क्षमताको समेत विकास हुने र पढाइँ सकिँदासम्म उसले स्वदेशमै राम्रो कमाई गर्न समेत थालिसकेको हुने र यसबाट विदेशीने क्रम केही मात्रामा भएपनि रोकिने उनको विश्वास छ ।
यसैगरी, स्थानीय तहहरुले आफ्नो क्षेत्रमा स्थानीय उपजहरुको उत्पादन, खपत र बजारीकरणमा विशेष ध्यानदिनुपर्ने उनको भनाइ छ । कृषि उत्पादन बढाउन उच्च प्रविधि भित्र्याउने र किसानहरुलाई त्यसमा अभ्यस्त बनाउन स्थानीय तहहरुको प्रमुख भूमीका हुने मल्ल बताउँछन् । यस्तै, ‘ल्याण्ड पुलिङ र ‘फार्मिङ’मा सरकार र निजी क्षेत्रबीच साझेदारी आवश्यक रहेको समेत उनको भनाइ छ ।
