नेपाल विद्युत प्राधिकरणले संसदको सार्वजनिक लेखा समितिमा उद्योगहरुले प्रयोग गरेको डेटिकेटेड तथा ट्रंक लाइनको विवरण बुझाएको छ । ७० हजार पेजको विवरणलाई १८ वटा पोकामा बाँधेर पेश गरिएको प्राधिरकणले जनाएको छ ।
सोमबार लेखा समितिले प्राधिकरणलाई ३ दिनभित्र टीओडी मिटरको डेटा उपलब्ध गराउन निर्देशन दिएको थियो । यस लगत्तै प्राधिकरणले काम थालेको थियो । आज बिहिबार उक्त टीओडी मिटरको तथ्यांक भएका ७० हजार पेजका कागजातहरु १८ वटा पोकामा बाँधेर लेखा समितिमा बुझाइएको प्राधिकरणले जनाएको छ ।
लेखा समितिले डेटिकेटेड तथा ट्रंक लाइनको विवादबारे यसअघि गठन भएका मनोज मिश्र र भक्तबहादुर पुन नेतृत्वको समितिले दिएका प्रतिवेदन पनि माग गरेको थियो ।
‘सबै कागजात गरेर ७० हजार पृष्ठजति छन्, मनोज मिश्र र भक्तबहादुर पुन नेतृत्वको समितिले दिएका प्रतिवेदन पनि समावेश गरेका छौँ’ प्राधिकरण स्रोतले भन्यो ।
गत शुक्रबारको लेखा समिति बैठकले प्राधिकरणसँग टीओडी मिटरसहितको विवरण माग्ने र त्यसका आधारमा प्रतिवेदन बनाएर आवश्यक निर्णय गर्ने निर्णय गरेको थियो ।
