स्वतन्त्र ऊर्जा उत्पादकहरूको संस्था नेपाल (इप्पान) का हालका उपाध्यक्ष उत्तम भ्लोन लामाले ‘इप्पान भिजन २०२९’ सार्वजनिक गरेका छन् । बुधबार साँझ पत्रकार सम्मेलन गरेर उनले ‘समृद्ध ऊर्जा क्षेत्रको लागि निर्णायक नेतृत्व’ नामको नारा सहित ‘इप्पान भिजन २०२९’ सार्वजनिक गरेका हुन् ।
उनले इप्पानको आगामी जेठ २९ गते हुन लागेका निर्वाचनमा वरिष्ठ उपाध्यक्षमा आफ्नो उम्मेदवारी पनि घोषणा गरेका छन् । साथै निर्वाचनको लागि आफ्नो टिम पनि घोषणा गरेका छन् ।
उनको टिमको उपाध्यक्षका उम्मेदवारमा उत्तर कुमार खत्री, हिम पाठक, सुशन कर्माचार्य, र विक्रम विष्ट रहेका छन्। त्यस्तै महासचिवमा टिएन आचार्य, उपमहासचिवमा कविता पोखरेल र कोषाध्यक्षमा नरेन्द्र बल्लभ पन्त उम्मेदवार रहेका छन् । सचिवका उम्मेदवारमा विजय मोहन भट्टराई, कुवेर मणि नेपाल, सुमन जोशी, शंकर बस्याल र अभिज्ञा मल्ल रहेका छन् ।
सदस्यका उम्मेदवारहरुमा अनुप आचार्य, जगत पोखरेल, कदम केसी, वर्ण लामिछाने र प्रतिमा ज्ञवाली रहेका छन् । कार्यसमितिमा १० जना सदस्यका उम्मेदवार रहने भए पनि सहमति मै नयाँ नेतृत्व चयन गर्ने उदेश्यले ५ जना सदस्यका उम्मेदवार भने हाल सार्वजनिक गरिएको छैन ।
हाल इप्पानका अध्यक्ष रहेका गणेश कार्कीले सहमति नै नयाँ नेतृत्व चयन गर्न आग्रह गरेका छन् । सरकारसँग नीतिगत बहसको लागि बलियो हुनको लागि पनि सहमति मै कार्यसमिति चयन गरेर एकताको संदेश दिनु पर्ने उनको भनाई थियो ।
हाल वरिष्ठ उपाध्यक्ष रहेका मोहन डाँगी नयाँ कार्यसमितिको स्वत अध्यक्ष हुने छन् । हालका अध्यक्ष गणेश कार्की पनि निर्वतमान अध्यक्षको हैसियतमा नयाँ कार्य समितिमा रहने छन् ।
