ऊर्जा उत्पादकहरुको संस्था नेपाल (इप्पान)को साधारणसभा (चुनावी साधारणसभा) जेठ २९ गते हुँदैछ । उक्त साधारणसभामा विधान संशोधन प्रस्ताव पेश हुने भएको छ । आइतबार बसेको इप्पानको बैठकले साधारणसभा प्रभावित नहुने गरी विधान संशोधन प्रस्ताव गर्ने निर्णय गरेको हो ।
२१औँ साधारणसभाले विधान संशोधनका लागि अध्ययन तथा सिफारिस समिति बनाएको थियो । उक्त समितिले काम अघि बढाएपनि इप्पानलाई महासंघमा रुपान्तरण गर्ने भनिएपछि विधान संशोधन प्रक्रिया रोकिएको थियो । तर, अहिले सरकारले नै महासंघको दर्ता रोकेका कारण इप्पान महासंघ बन्न पाएन । जसका कारण अब फेरि विधान संशोधन प्रक्रिया अघि बढ्ने भएको हो ।
साधारणसभा प्रभावित नहुने गरी हालकै कार्यसमितिको तर्फबाट साधारणसभामा विधान संशोधन प्रस्ताव पेश गर्ने जिम्मेवारी अध्यक्ष गणेश कार्कीलाई दिइएको छ । अब उनले सल्लाहकारहरु, पदाधिकारी, कार्यसमिति सदस्य र विज्ञहरुसँग छलफल गरेर प्रस्ताव तयार पार्नेछन् । उक्त प्रस्ताव कार्यसमितिले पारित गरेपछि साधारणसभामा पेश हुनेछ ।
विधान संशोधन गरेर के प्रावधान राखिँदैछ ?
हाल इप्पानमा वरिष्ठ उपाध्यक्ष नै अर्को कार्यकालमा स्वतः अध्यक्ष बन्ने प्रावधान छ । यो प्रावधान अनुसार हालका वरिष्ठ उपाध्यक्ष मोहन डाँगी आगामी कार्यकालका अध्यक्ष बन्दैछन् ।
अब यो प्रावधानलाई संशोधन गरेर प्रत्यक्ष निर्वाचनमार्फत अध्यक्ष चयन गर्नुपर्ने बहस इप्पानभित्र सुरु भएको छ । साधारणसभामा विधान संशोधन प्रस्ताव पेश भएपनि साधारणसभाले पारित नगर्न पनि सक्छ ।
