नेपालको अग्रणी अटोमोबाइल घराना वैद्य अर्गनाइजेसन नेपालका लागि अल्ट्राभोइलेटको आधिकारिक वितरक र आयातकर्ता नियुक्त भएको छ । भारतीय प्रिमियम इलेक्ट्रीक मोटरसाइकल उत्पादक अल्ट्राभोइलेटले वैद्यज अर्गनाइजेसनलाई नेपालका लागि नयाँ बिक्रेता नियुक्त गरेको हो ।
यसअघि नेपालमा अल्ट्राभोइलेटका मोटरसाइकल केडिया ग्रुपले बिक्री वितरण गर्दै आएको थियो । प्रिमियम इलेक्ट्रीक ब्राण्ड एथरका स्कुटर बिक्री गर्दै आएको कम्पनीले अब अल्ट्राभोइलेटका इलेक्ट्रीक मोटरसाइकल पनि बिक्री गर्ने भएको हो ।
अल्ट्राभोइलेटको डिलरशिप पाएसँगै वैद्यज अर्गनाइजेसनको आक्रामक बजार विस्तारको योजना अघि बढाएको छ । कम्पनीले देशभरका ग्राहकहरूलाई विश्वस्तरीय स्वामित्वको अनुभूति दिलाउन प्रिमियम शोरुम अनुभव, अत्याधुनिक सर्भिस पूर्वाधार निर्माण र भरपर्दो बिक्रीपछिको सेवा नेटवर्क उपलब्ध गराउनमा ध्यान केन्द्रित गर्ने भएको हो ।
अल्ट्राभोइलेटका सीईओ तथा सहसंस्थापक नारायण सुब्रमण्यमले वैद्यज अर्गनाइजेसनसँग साझेदारी गर्न पाउँदा आफू उत्साहित रहेको बताए । ‘नेपालमा अल्ट्राभोइलेटको अनुभवलाई अझ सुदृढ र विस्तार गर्न वैद्यज अर्गनाइजेसनसँग साझेदारी गर्न पाउँदा हामी उत्साहित छौं । यो सहकार्य हाम्रो विश्वव्यापी यात्रामा एउटा महत्त्वपूर्ण अध्याय हो, किनकि हामी हाम्रा फ्ल्यागसिप उत्पादनहरू एफ ७७ सिरिजका साथ अन्तर्राष्ट्रिय स्तरमा तीव्र रूपमा विस्तार भइरहेका छौं । यी मोटरसाइकलहरू भारतमा डिजाइन र निर्माण गरिएका हुन् । जसले डिजाइन, प्रविधि र प्रफर्मेन्सप्रतिको हाम्रो प्रतिबद्धता र अर्को पुस्ताको गतिशीलताको उत्कृष्ट नमुना झल्काउँछन्’ उनले भने ।
उनले वैद्यज अर्गानाइजेसनसँग मिलेर ग्राहकलाई उत्पादनको पोर्टफोलियो, अत्याधुनिक प्रविधि र विश्वस्तरीय बिक्रीपछिको सेवासम्मको पूर्ण इकोसिस्टम प्रदान गर्ने बताए ।
वैद्यज अर्गनाइजेसनका सीईओ सूर्यांश वैद्यले कम्पनीको पोर्टफोलियोमा अल्ट्राभोइलेट थपिएसँगै नेपालको ईभी मोटरसाइकल बजार पूर्ण रूपमा नयाँ युगमा प्रवेश गर्ने बताए । ‘नेपाली अटोमोबाइल बजार द्रुत गतिमा विकसित भइरहेको छ। आजका ग्राहकहरू केवल यात्राका लागि सवारी साधन मात्र खोजिरहेका छैनन्, उनीहरू प्रविधि, उत्कृष्ट प्रफर्मेन्स, प्रिमियम डिजाइन र विश्वस्तरीय स्वामित्वको अनुभव पनि चाहन्छन्। हाम्रो पोर्टफोलियोमा अल्ट्राभोइलेट थपिएसँगै नेपालको ईभी मोटरसाइकल बजार पूर्ण रूपमा नयाँ युगमा प्रवेश गर्नेछ भन्ने कुरामा हामी विश्वस्त छौं’ उनले भने ।
अल्ट्राभोइलेट इलेक्ट्रीक मोटरसाइकल ब्रान्ड मात्र नभई यो एरोस्पेस ग्रेड टेक्नोलोजी, फ्युचरिस्टिक डिजाइन, उन्नत ब्याट्री प्रणाली र स्मार्ट कनेक्टिभिटी सुविधाहरू सहित इन्जिनियर गरिएको अर्को पुस्ताको प्रिफर्मेन्स मोबिलिटी प्लेटफर्म भएको बताइएको छ । यो युरोपसँगै विश्वभर पर्फमेन्स, इनोभेसन र प्रविधिमा आधारित राइडिङ अनुभवको उत्कृष्ट मिश्रण प्रदान गर्ने ब्राण्डको रूपमा परिचित छ ।
एक्स ४७ क्रसओभर ल्याउँदै
कम्पनीले डिलरशिप पाएसँगै बजार विस्तारमा आक्रमक रूपमा लाग्ने तयारी गरेको छ । कम्पनीले चाँडै नेपालमा अल्ट्राभोइलेटको बहुप्रतिक्षित एक्स ४७ क्रसओभर मोटरसाइकल नेपाल ल्याउने भएको हो । एक्स ४७ क्रसओभरको प्री बुकिङ छिट्टै सुरू गर्ने कम्पनीले जनाएको छ ।
एक्स ४७ क्रसओभर आफ्नो सेगमेन्टमा इन्ट्रीग्रेटेड राडार भएको विश्वकै पहिलो मोटरसाइकल समेत हो । एक्स ४७ दैनिक राइडरहरू, रोमान्चक यात्रा मन पराउनेहरू र उत्साहीहरूका लागि इन्जिनियरिङ र निर्माण गरिएको छ ।
त्यस्तै, कम्पनीले नेपालमा अल्ट्राभोइलेटमा एफ ७७ को ओरिजिनल र एफ ७७ रिकन मोडलको बुकिङ खुलाएको छ । कम्पनीले एफ ७७ को ओरिजिनल मोडलको सुरूवाती मूल्य ८ लाख ११ हजार र एफ ७७ को रिकनको मूल्य ९ लाख ६९ हजार रुपैयाँ तोकेर बुकिङ खुलाएको हो ।
एफ ७७ मोटरसाइकलमा १०।३ किलोवाट आवरको ब्याट्रीप्याक जडान गरिएको छ । यसले एकपटकको फुलचार्जमा ३२३ किमी आइडीसी रेन्ज दिनेछ । यसमा ३० किलोवाटको इलेक्ट्रीक मोटर छ । जसले १०० न्युटन मिटर टर्क प्रदान गर्छ ।
यो बाइकले मात्र २।८ सेकेन्डमा ० देखि ६० किमी प्रतिघण्टाको स्पीड भेटाउन सक्छ । यसको टप स्पीड १५५ किमी प्रतिघण्टा छ । यसमा रहेको ३९ लेभल ट्रयाक्सन कन्ट्रोल सिस्टमले विभिन्न सडक परिस्थितिहरूमा उत्कृष्ट पकड र स्थिरता सुनिश्चित गर्दछ । यसमा १० लेभलको रिजेनेरेटिभ ब्रेकिङ प्रणाली छ । जसले थप सुविधा प्रदान गर्दै प्रभावकारी रूपमा यसको रेन्ज बढाउँछ ।
यसमा डाइनामिक स्टेबिलिटी कन्ट्रोल छ । जसले माइल्ड, एक्टिभ वा प्यानिक ब्रेकिङका बेला पूर्ण नियन्त्रण र स्थिरता सुनिश्चित गर्न एबीएससँग रिजेनेरेटिभ ब्रेकिङ लेभललाई सहज रूपमा मिलाउँछ । जसले राइडिङलाई सुरक्षित बनाउँछ । यसको हिल होल्ड फिचरले उकालो सडकहरूमा बारम्बार ब्रेक नदबाए पनि मोटरसाइकललाई स्थिर राख्न मद्दत गर्दछ ।
