चालु आर्थिक वर्षको ७ महिनामा ५ हजार ८ सय युनिट विद्युतीय कार नेपाल भित्रिएका छन् । भन्सार विभागले सार्वजनिक गरेको चालु आर्थिक वर्ष २०८२/०८३ को माघ मसान्त सम्मको तथ्यांक अनुसार यस अवधिमा ५ हजार ८९४ युनिट विद्युतीय कार नेपाल भित्रिएका हुन् ।
यसमध्ये ३ अर्ब ५० करोड १३ लाख १३ हजार मूल्य बराबरका ५० किलोवाटसम्मका १ हजार ९९२ युनिट ईभी नेपाल आयात भएका छन् । त्यस्तै, ८ अर्ब ७६ करोड ४१ लाख ७३ हजार बराबरका ५१ देखि १०० किलोवाट सम्मका ३ हजार ४०२ युनिट विद्युतीय जीप, कार र भ्यान नेपाल भित्रिएका छन् ।
१ अर्ब ५३ करोड ५२ लाख ५५ हजार मूल्य बराबरका १०१ देखि २०० किलोवाट सम्मका ४९३ युनिट विद्युतीय कार आयात भएका छन् । २०१ देखि ३०० किलोवाट सम्मका ७ युनिट ईभी आयात भएको भन्सारको तथ्यांक छ । यीनको मूल्य ४ करोड ६९ लाख ९२ हजार छ ।
यसरी आयात भएका विद्युतीय गाडीबापत सरकारले ८ अर्ब ४६ करोड १९ लाख ९ हजार रुपैयाँ राजस्व प्राप्त गरेको छ ।
यसैबीच, २३ लाख ९७ हजार बराबरका ५० किलोवाट सम्मका २ युनिट अनएसेम्बल्ड ईभी पनि नेपाल भित्रिएका छन् । यी २ युनिट अनएसेम्बल्ड ईभी आयात हुँदा सरकारले ७ लाख ६९ हजार राजस्व पाएको छ ।
