संघीय संसद्को नयाँ भवन तयार नभएपछि आगामी आर्थिक वर्षको बजेट हाल सञ्चालमा रहेको पूरानै बहुउद्देश्यीय हलबाट प्रस्तुत हुँदैछ । अर्थमन्त्री डा. स्वर्णिम वाग्लेले शुक्रबार अपरान्ह ४ बजे पूरानै हलबाट आगामी आर्थिक वर्ष २०८३/०८४ को बजेट भाषण गर्नेछन् ।
नयाँ हल तयार नभएपछि यसपाली बजेट भाषणमा निजी क्षेत्रका उद्योगी व्यवसायीहरुलाई फरक कोठामा राखेर ‘स्क्रिन’मा मात्रै बजेट भाषण देखाइने भएको छ । पूरानो हलमा पर्याप्त ठाउँ नभएपछि संसद सचिवालयले निजी क्षेत्रका संगठनका प्रतिनिधिहरुलाई छुट्टै कोठामा राखेर त्यहाँ स्क्रिन राखेर बजेट लाइभ देखाउने वैकल्पिक प्रबन्ध गरेको हो ।
कुन संगठनबाट को को जाँदैछन् ?
नेपाल उद्योग परिसंघबाट बजेट भाषणमा दुई जना सहभागी हुँदैछन् । अध्यक्ष वीरेन्द्रराज पाण्डे र महानिर्देशक घनश्याम ओझा सीएनआईबाट सहभागी हुने पक्का भएको छ ।
यस्तै, नेपाल चेम्बर अफ कमर्सबाट १९ जना जाँदैछन् । चेम्बरबाट अध्यक्ष कमलेश कुमार अग्रवालसहित पदाधिकारी र महानिर्देशकसमेत सहभागी हुन लागेका हुन् ।
नेपाल उद्योग वाणिज्य महासंघबाट को को सहभागी हुँदैछन् भन्ने टुङ्गो लागिसकेको छैन । अध्यक्ष अन्जन श्रेष्ठ एक्लै जान सक्ने बताइन्छ ।
छुट्टै कोठामा राखिने भएपछि उत्साहित छैन निजी क्षेत्र
विगतमा बजेट भाषणका क्रममा निजी क्षेत्रका प्रतिनिधिहरु मूल हलमै सहभागी हुन्थे । ध्यानपूर्वक बजेट वक्तव्य सुन्थे र बाहिर निस्किएर सञ्चारकर्मीमाझ प्रतिक्रिया दिन्थे । तर, यसपटक फरक हलमा राखेर स्क्रिनमा लाइभ देखाउने भएपछि निजी क्षेत्रले सहभागीताका लागि खासै बल गरेको छैन ।
‘त्यहाँ गएर एउटा कोठामा बसेर लाइभ हेर्नुभन्दा घरमै बसेर हेरे भइहाल्यो नि !’ एक जना उद्योगीले भन्छन्, ‘यो प्रभावकारी पनि हुँदैन । मन्त्री र सांसदसँग अन्तरक्रिया नहुने भएपछि जानु र नजानुको अर्थ हुँदैन ।’
