अन्तर्राष्ट्रिय मुद्राकोष (आईएमएफ)ले पुँजीगत खर्च बढ्दो क्रममा रहेको र कृषि उत्पादन पनि राम्रो हुने अपेक्षा भएकाले चालू आर्थिक वर्षमा नेपालको अर्थतन्त्रमा सकारात्मक प्रभाव पर्ने जनाएको छ । आईएमएफले एसिया तथा प्यासिफिक क्षेत्रको ‘रिजनल इकोनोमिक आउटलुक’सार्वजनिक गर्दै नेपालको आर्थिक वृद्धिदर ४.९ प्रतिशत पुग्ने अनुमान गरेको हो ।
गत आर्थिक वर्षमा नेपालको आर्थिक वृद्धि ३.१ प्रतिशत थियो । चालु आर्थिक वर्षमा आर्थिक वृद्धिदर सुधार हुने देखिनुमा मौद्रिक नीतिको सहयोगी भूमीकाले पनि प्रभाव पार्ने देखिएको आईएमएफको भनाइ छ ।
तर, आईएमएफले गत अप्रिलमा सार्वजनिक गरेको नेपालको आर्थिक वृद्धिदरको प्रक्षेपणको तुलनामा यसपटकको प्रक्षेपण भने घटाएको छ । यसअघि ५.२ प्रतिशतको आर्थिक वृद्धि हुने प्रक्षेपण गरिएको थियो ।
दक्षिण एसियाली क्षेत्रमा भारतको आर्थिक वृद्धि ७ प्रतिशत रहने आईएमएफको प्रक्षेपण छ । यो विवरण गत अप्रिलको तुलनामा २ आधार बिन्दूले बढी हो ।
विश्व आर्थिक वृद्धिमा एसिया प्यासिफिकको योगदान ६० प्रतिशत कायमै रहने आईएमएफको प्रक्षेपण छ ।
