निर्माणको सिजनमै सिमेन्टको मूल्य बढेको छ । निर्माण व्यवसायीहरुका अनुसार निर्माणको सिजन सुरू भएसँगै उद्योगीहरूले सिमेन्टको मूल्य बढाएका हुन् ।
पछिल्लो एक महिनाको अवधिमा सिमेन्टको मूल्य प्रतिबोरा २ सय रुपैयाँसम्म बढेको नेपाल निर्माण व्यवसायी महासंघका अध्यक्ष रवि सिंहले बताए । उनका अनुसार सिजनमै सिमेन्ट उद्योगीहरुले बिना कारण मूल्य बढाउँदा निर्माण उद्योग थप समस्यामा परेको छ ।
यसअघि प्रतिबोरा ५० रुपैयाँसम्म मूल्य बढाइएकोमा पछिल्लो समय प्रतिबोरा थप ३० देखि ५० रूपैयाँसम्मले सिमेन्टको मूल्य बढेको नेपाल निर्माण सामग्री व्यापार संघले जानकारी दिएको छ । संघका अनुसार बढेको मूल्य गत शुक्रबारदेखि कायम भइसकेको छ । ओपिसी सिमेन्टमा प्रतिबोरा ३० रूपैयाँ र पिपिसी सिमेन्टमा प्रतिबोरा ५० रूपैयाँले थप मूल्य वृद्धि भएको संघले जनाएको छ ।
निर्माण व्यवसायीहरुले भने उद्योगीहरुले बिना कारण कात्तिकदेखि सिमेन्टले मूल्य बढाएको आरोप लगाएका छन् । अन्तराष्ट्रिय बजारमा कुनै पनि वस्तु (कच्चापदार्थ)को भाउ नबढे पनि नेपालका उद्योगीहरुले कार्टेलिङ गरेर एक महिनाको अवधिमा प्रतिबोरा १५० देखि २ सय रुपैयाँसम्म मूल्य बढाएको निर्माण व्यवसायी महासंघका अध्यक्ष सिंह बताउँछन् ।
यता, सिमेन्ट उद्योगीहरुले भने कार्टेलिङ वा सिण्डिकेट गरेर मूल्य बढाएको नभई केही उद्योगहरुले लागत मूल्य बढी भएपछि त्यसमा मूल्य समायोजन मात्रै गरेको बताएका छन् ।
