चालु आर्थिक वर्ष २०८१/०८२ को ४ महिना (साउनदेखि कार्तिकसम्म)मा साढे ६६ करोड बढीको सिमेन्ट तथा क्लिङ्कर निर्यात भएको छ । भन्सार विभागका अनुसार यस अवधिमा ६६ करोड ५८ लाख ७२ हजार बराबरको सिमेन्ट तथा क्लिङ्कर निर्यात भएको हो ।
यो ४ महिनामा २९ हजार ८५१ टन क्लिङ्कर निर्यातमार्फत १६ करोड ९० लाख ९ हजार रुपैयाँ नेपाल भित्रिएको छ । यस्तै, २ लाख ३८ हजार ८५४ टन सिमेन्ट निर्यातमार्फत नेपालले ४९ करोड ६८ लाख ६३ हजार रुपैयाँ आम्दानी गरेको छ ।
नेपालबाट सिमेन्ट र क्लिङ्कर दूबै भारतमा निकासी हुँदै आएको छ ।
पछिल्लो समय भारतीय पक्षले ‘इन्डियन स्ट्याण्डर्ड’ नवीकरण गर्न आनाकानी गर्दा नेपालबाट सिमेन्टको निकासी प्रभावित भइरहेको छ । उद्योगीहरुले ‘इन्डियन स्ट्याण्डर्ड’ नवीकरणमा सरकारबाट कुटनीतिक पहल आवश्यक रहेको बताउँदै आएका छन् ।
