आर्थिक समस्यामा परेको चिनियाँ इलेक्ट्रिक कार निर्माता कम्पनी नेटा अटोलाई त्यहाँको स्थानीय सरकारले सहयोग गरेको छ । स्थानीय सरकारको सहयोग पाएपछि कम्पनीले कम्पनीको पुनर्संरचना पनि थालेको छ ।
नानिङ इन्डस्ट्रियल इन्भेस्टमेन्ट ग्रुपले नेटाको माउ कम्पनी होझोन अटोसँग रणनीतिक साझेदारी गरेको हो । साझेदारी अनुसार ग्रुपले कम्पनीलाई आपूर्ति र आपूर्ति श्रृंखलामा वित्तीय सहयोग प्रदान गर्ने स्थानीय मिडिया यिसाईले नेटाको स्रोतलाई उद्धृत गर्दै भनेको छ । यस समूहले नेटालाई कच्चा पदार्थको स्रोत व्यवस्थापन, उत्पादन, ढुवानी र आफ्नो नानिङ उत्पादन आधारबाट केडी (नक्ड डाउन) किटको निर्यात व्यवस्थित गर्न मद्दत गर्ने बताईएको छ । रिपोर्ट अनुसार यस साझेदारीले नेटालाई विदेशी मोडेल उत्पादन र डेलिभरीमा सहयोग गर्नुका साथै यसको अन्तर्राष्ट्रिय बजार विस्तार गर्न र विदेशमा आपूर्ति श्रृंखलाको स्थिरता सुनिश्चित गर्न पनि मद्दत गर्नेछ ।
नानिङ इन्डस्ट्रियल इन्भेस्टमेन्ट ग्रुप नोभेम्बर २०१३ मा नानिङ सिटी सरकारको नेतृत्वमा स्थापना भएको हो, जसको मुख्य व्यवसायहरूमा औद्योगिक लगानी र व्यवस्थापन, पार्क निर्माण र संचालन र सम्पत्ति सञ्चालन तथा व्यवस्थापन समावेश छन् ।
होझोन सन् २०१४ को अक्टोबरमा स्थापना भएको हो, र सन् २०१७ को अप्रिलमा चीनको आर्थिक योजनाकार नेशनल डेभलपमेन्ट एण्ड रिफर्म कमिसन (NDRC) द्वारा गाडी उत्पादन गर्न स्वीकृत भएको थियो । नेटा ब्राण्डले चीनमा नेटा एक्स, नेटा जीटी, नेटा एस, नेटा आय, र नेटा एल जस्ता मोडेलहरू बिक्री गर्छ, जसको मूल्य १३ हजार ८ सय डलरसम्म रहेको छ।
सन् २०२३ को जुनमा होझोनले हङकङमा सूचीकृत हुने आवेदन दिएको थियो । तर, त्यसपछि कुनै नयाँ प्रगतिहरू देखिएको छैन, र कम्पनीको संचालन हालै चुनौतीपूर्ण बनेको छ । नेटाले ठूलो संख्यामा कर्मचारी कटौती सुरु गरेको छ, जुन ७० प्रतिशतसम्म पुग्न सक्ने विभिन्न रिपोर्टहरुले उल्लेख गरेका छन्।
कम्पनीले अब ठूलो रणनीतिक पुनःसंरचना अघि बढाइरहेको बताईएको छ । यस पुनर्संरचनापछि नेटाको संगठनात्मक संचालन क्षमतामा ५० प्रतिशतले वृद्धि हुने र संचालन खर्च ५० प्रतिशतभन्दा बढीले घट्ने अपेक्षा गरिएको छ ।
नेटाले नोभेम्बर १२ मा बोलिभियाको सबैभन्दा ठूलो अटो बिक्री समूह ग्रुपो साभेद्रासँग सम्झौता गरेको छ, जसले संयुक्त रूपमा च्यानलहरू निर्माण गर्ने र बोलिभियामा गाडी बिक्री गर्नेछ । नेटाले अर्को वर्षको पहिलो त्रैमासिकमा बोलिभियामा आफ्नो पहिलो स्टोर खोल्ने र बिक्री सुरु गर्ने योजना बनाएको छ । सन् २०२५ सम्ममा कम्तीमा १० स्थानीय बिक्री च्यानलहरू स्थापना गर्दै नेटा आय र नेटा एक्सको बिक्री शुरू गर्ने बताईएको छ ।
नेपालमा नेटाका गाडीहरु चौधरी समूहले आयात गर्दै आएको छ ।
