नेपाल प्रिमियर लिगको लागि लुम्बिनी लायन्सले बार्बाडियन फास्ट बलर रामोन सिमण्ड्सलाई भित्र्याएको छ । सिमण्ड्स लुम्बिनी लायन्समा आवद्ध चौँथो विदेशी खेलाडी हुन् ।
बायाँ हाते बलर सिमण्ड्सले आईसीसी यू–१९ विश्वकप क्रिकेटमा वेस्ट इन्डिज यू–१९ टिमका लागि उत्कृष्ट प्रदर्शन गरेका थिए ।
‘नेपाल प्रिमियर लिगको यो पहिलो सिजनमा लुम्बिनी लायन्सको हिस्सा बन्न पाउनु मेरो करियरको रोमाञ्चक अध्याय हो, नेपालीहरुको क्रिकेटप्रतिको उत्साहको बारेमा मैले धेरै सुनेको थिएँ, अब मैदानमा नै त्यो उर्जा हेर्न आतुर छु’ उनले भनेका छन् ।
लुम्बिनी लायन्सका अध्यक्ष ईश्वर जिसीले रामोन सिमण्ड्सलाई लुम्बिनी लायन्समा स्वागत गर्न पाउँदा निकै खुशी लागेको बताउँदै उनको बलिङ आफ्नो टिमको लागि अत्यन्त महत्वपूर्ण हुने बताए । उनले उनको आगमनले टिमका युवा खेलाडीहरूलाई प्रेरणा दिने समेत विश्वास व्यक्त गरेका छन् ।
नेपाल प्रिमियर लिग मंसिर १५ मा सुरु भएर पुष ६ गतेसम्म चल्नेछ ।
