राष्ट्रिय स्वतन्त्र पार्टी (रास्वपा)की सांसद सोबिता गौतमले नेपालको हवाई क्षेत्रलाई सुरक्षित बनाउन नियामक र सेवा प्रदायक निकाय अलगअलग बनाउन माग गरेकी छिन् । मंगलबार प्रतिनिधिसभाको बैठकमा बोल्दै उनले हवाई क्षेत्रलाई सुरक्षित बनाउन नियामक र सेवा प्रदायक छुट्याउने विधेयक छिटो अगाडि बढाउन पनि माग गरिन् ।
साउन ९ गते त्रिभुवन विमानस्थलभित्रै जहाज दुर्घटना हुँदा १८ जनाको मृत्यु भएपछि नागरिक उड्डययन प्राधिकरण (क्यान)लाई नियामक र सेवा प्रदायक गरि २ निकायमा विभक्त गर्नुपर्ने आवाज उठिरहेका बेला साउन २३ गते नुवाकोटमा हेलिकप्टर दुर्घटनामा परि ५ जनाको मृत्यु भएपछि यो माग झन चर्किएको छ । यसै शिलशिलामा रास्वपाले पनि क्यानलाई टुक्र्याउन माग गरेको हो ।
आफूले नेपालको हवाई क्षेत्रको यात्रा सुरक्षित गर्नुपर्ने भनेर संसदमा ६ पटक बोलिसकेको उल्लेख गर्दै सांसद गौतमले हवाई क्षेत्रलाई सुरक्षित बनाउन नियामक र सेवा प्रदायक छुट्याउने कानुन बनाउनुपर्ने बताइन् । उनले यो विषय आफूले सम्बन्धित मन्त्रीलाई पनि भनेको तर, विधेयक संसदमा नआएको भन्दै ध्यानाकर्षण गराइन् ।
उनले हवाई सेवाको नियामक निकायका रुपमा रहेको क्यान ‘रेगुलेटरी फेलियर’ भएको समेत बताइन् ।
‘इयुको कालोसूचीमा पर्नु, आइकाओले अडिटमा एकदमै कम नम्बर दिनुले पनि नेपालको हवाई क्षेत्रको रेगुलेटरी फेलियर भइसकेको देखाउँछ’ उनले भनिन् ।
