काठमाडौँमा चलिरहेका ठूला होटल तथा रेष्टुरेन्टले अब तराईबाट आफैँले एलपी ग्यास ल्याउनुपर्ने भएको छ । नेपाल आयल निगमले ‘बल्क’मा ग्यास आवश्यक पर्ने होटल तथा रेष्टुरेन्टले तराईमा रहेका ग्यास उद्योगबाट आफैँले भरी सिलिण्डर ढुवानी गरेर ल्याउनुपर्ने प्रावधान लागू गरेको हो ।
निगमका प्रवक्ता मनोज ठाकुरका अनुसार घरायसी उपभोक्तालाई पहिलो प्राथमिकतामा राख्दै ग्यासको आपूर्ति सहज बनाउन यो निर्णय गरिएको हो । ‘अहिले तराईका उद्योगबाट काठमाडौँका लागि ढुवानी भएर आउने ग्यासको पहिलो प्राथमिकतामा घरायसी उपभोक्तालाई राखिएको छ’ उनले भने, ‘बल्कमा ग्यास लिँदै आएका होटल तथा रेष्टुरेन्टहरु जो छन्, ति व्यवसायिक ग्राहक भए । तिनले आफूलाई चाहिने ग्यास आफैँले तराईका उद्योगमा पुगेर ल्याउनुपर्ने व्यवस्था गरेका हौँ ।’
उनका अनुसार सामान्य अवस्थामा २२ वटा ग्यास उद्योगले काठमाडौँमा ग्यास सप्लाई गर्थे । भोटेकोशी बाढी लगत्तै कृष्णभीरमा पृथ्वी राजमार्ग भासिएपछि अहिले काठमाडौँमा ग्यास सप्लाई गर्दै आएका २२ मध्ये १८ वटा उद्योगमा बुलेट आउन नसक्ने अवस्था छ । त्यसकारण उपत्यकाको आपुर्तिलाई सहज बनाउन निगमले तराईका उद्योगहरुमै रिफिलिङ गरेर काठमाडौँमा सानो गाडीमार्फत ढुवानी गरेर एलपी ग्यास ल्याउने प्रबन्ध मिलाएको ठाकुरको भनाइ छ ।
‘तराईका उद्योगहरुमा रिफिलिङ गरेर ग्यास ल्याउँदा १० चक्के ट्रकले जम्मा ४ सय सिलिण्डर बोक्छ, त्यो पनि सहजै आउन सक्यो भने मात्रै । नत्र सानो गाडीबाट ६०/७० वटा सिलिण्डरका दरले ल्याउनुपर्ने अवस्था छ’ ठाकुरले थपे, ‘यसकारण एउटा मात्रै सिलिण्डर भएका घरायसी ग्राहकहरु, विद्यार्थीहरु, मजदूरहरुलाई प्राथमिकतामा राख्नुपर्यो । यसो हुँदा जसलाई बल्कमा ग्यास चाहिन्छ उहाँहरुले अब आफैँ तराईका उद्योगसम्म गाडी पठाएर ल्याउनुपर्ने हुन्छ । तराईमा त ग्यास जति पनि आएकै छ, उहाँहरुसँग ढुवानीका साधन पनि हुन्छन् । तर, उद्योगले ढुवानी गरेर ल्याएका ग्यास घरायसी ग्राहकले मात्रै पाउँछन्, बल्कमा किन्ने व्यवसायिक ग्राहकले पाउँदैनन् ।’
उनका अनुसार अहिले तराईका उद्योगबाट ग्यास बोकेर आउने गाडीहरु त्रिभुवन राजपथ हुँदै काठमाडौँ भित्रिने र ग्यास लिन जाने खाली गाडीहरु कान्ति लोकपथ हुँदै जाने प्रबन्ध मिलाइएको छ ।
