ग्लोबल आईएमई बैंकले गत आर्थिक वर्षमा ६ अर्ब २२ करोड ८१ लाख रूपैयाँ खुद नाफा आर्जन गरेको छ । आर्थिक वर्ष २०८२/०८३ को चौथो त्रैमास सम्मको अपरिष्कृत वित्तीय विवरण अनुसार बैंकले अघिल्लो आर्थिक वर्षको तुलनामा २२.६२ प्रतिशतले नाफा बढाएको हो ।
अघिल्लो आर्थिक वर्ष बैंकले ५ अर्ब ७ करोड ६३ लाख रूपैयाँ खुद नाफा कमाएको थियो । नाफासँगै बैंकको प्रतिसेयर आम्दानी पनि १३.३२ रुपैयाँबाट १६.३४ रुपैयाँ पुगेको छ ।
बैंकले आर्थिक वर्ष २०८२/०८३ मा १६ अर्ब २० करोड रुपैयाँ खुद ब्याज आम्दानी गरेको छ । सम्भावित कर्जा नोक्सानीमा बैंकले ४ अर्ब ७८ करोड ८४ लाख रूपैयाँ प्रोभिजन गरेको छ । बैंकको सञ्चालन मुनाफा ८ अर्ब ६८ करोड रुपैयाँ पुगेको छ । बैंकको वितरणयोग्य मुनाफा ४ अर्ब ५८ करोड रहेको छ भने प्रति शेयर वितरणयोग्य मुनाफा १२.०२ रुपैयाँ रहेको छ ।
बैंकको पुँजी कोष अनुपात १२.१० प्रतिशत, प्राथमिक पुँजी अनुपात १०.०४ प्रतिशत र कोषको लागत ३.४३ प्रतिशतमा सिमित भएको छ । आधार दर ४.७५ प्रतिशत कायम भएको छ । बैंकको प्रतिसेयर नेटवर्थ १८३.१४ रुपैयाँ रहेको छ ।
बैंकको कुल निक्षेप ६ खर्ब ६९ अर्ब १७ करोड रुपैयाँ पुगेको छ । कर्जा लगानी ४ खर्ब ३९ अर्ब ३४ करोड रुपैयाँ पुगेको छ ।
बैंकको चुक्ता पुँजी ३८ अर्ब ११ करोड रुपैयाँ छ । जगेडा कोष २७ अर्ब १० करोड रुपैयाँ पुगेको छ ।
