सोमबार दिउँसो काठमाडौँको वालुवाटारमा रहेको श्री जय गोमा गणेश आयल स्टोर बन्द अवस्थामा थियो। स्टोरमा ‘पेट्रोल छैन, धन्यवाद’ लेखिएको बोर्ड झुण्ड्याईएको थियो।
काठमाडौँको व्यस्त स्थानमै रहेको पम्पले पेट्रोल छैन भनेर पम्प बन्द गरेपछि बजारमा कतै पेट्रोलियम पदार्थको अभाव भएको हो कि भन्ने त्रास सर्वसाधारणमा देखिएको छ। कतिपयले मूल्य बढ्न लागेकोले पम्प बन्द गरिएको हुन सक्ने आशंका गरेका छन्।
किनभने नेपाल आयल निगमले भारतीय आयल कर्पोरेशनबाट प्राप्त मूल्य सूची अनुसार हरेक अंग्रेजी महिनाको १ तारिख र १५ तारिखमा पेट्रोलियम पदार्थको मूल्य समायोजन गर्दै आएकोमा गत जेठ १ गते (मे १५ तारिख)मा मूल्य समायोजन गरेन । मूल्य घटबढ नभएपनि निगमले विज्ञप्ति मार्फत मूल्य यथावत राखिएको जानकारी गराउने गरेको थियो।
३ दिन अगाडी मूल्य समायोजनको निर्णय नभएको र अहिले पेट्रोल पम्प बन्द देखिन थालेकोले आम सर्वसाधारणले पेट्रोलियम पदार्थको अभाव रहेको वा मूल्य बढ्न लागेको आशंका गरेका हुन् ।
तर नेपाल आयल निगमले भने ति दुवै विषयको खण्डन गरेको छ। आयल निगमका प्रवक्ता मनोज ठाकुरले पेट्रोलियम पदार्थको अभाव नरहेको र केही सिमित पम्पमा लगातार दुई दिन विदाको कारण पेट्रोलियम पदार्थ सकिएको हुन सक्ने बताए। उनका अनुसार शनिवार र आइतबार सार्वजनिक विदा हुने भएकोले शुक्रबार नै पम्पहरुले दुई दिनको लागि चाहिने पेट्रोलियम पदार्थ माग गरेर राख्नु पर्ने हुन्छ। खपतको अनुमान गरेर पम्पहरुले पेट्रोलियम पदार्थको माग गर्ने भएकोले शुक्रबार ल्याईएको डिजेल पेट्रोल सकिएको हुन सक्ने उनले उल्लेख गरे।
आज सोमबार थानकोट डिपोबाट सबै पेट्रोल पम्पहरुमा डिजेल पेट्रोल पठाउने कार्य जारी नै रहेकोले कहिकतै डिजेल/पेट्रोलको अभाव नहुने उनले बताए।
त्यस्तै उनले मूल्य समायोजनको विषयमा मूल्य स्थिर नै राखिएको र निगमको कार्यकारी निर्देशकको राजीनामा आएर पद रिक्त भएकोले निगमले मूल्यबारे कुनै विज्ञाप्ति जारी नगरेको बताए। उनका अनुसार अब मार्च १ तारिखमा मात्र मूल्य समायोजन हुने छ।
उनले पेट्रोलियम पदार्थको कुनै अभाव नरहेको र नहुने स्पष्ट पारे ।
