राष्ट्र बैंकले म्यानपावर कम्पनीका सञ्चालक तथा प्रतिनिधिहरु विदेशमा प्रचार तथा प्रवद्र्धनका लागि जाँदा साट्न पाउने डलरको सीमा बढाएको छ । मौद्रिक नीतिले गरेका व्यवस्था कार्यान्वयनका लागि राष्ट्र बैंकले निर्देशन जारी गर्दै म्यानपावर कम्पनीका सञ्चालक तथा प्रतिनिधिहरु विदेशमा प्रचार तथा प्रवद्र्धनका लागि जाँदा साट्न पाउने डलरको सीमा बढाएको हो ।
यसअघि वार्षिक १ सय जनासम्म कामदार पठाउने म्यानपावर कम्पनीले विदेशमा प्रचार गर्न जाँदा एक आर्थिक वर्षमा एक पटक वा पटक पटक गरि १५ हजार अमेरिकी डलरसम्म सटही सुविधा पाउँदै आएका थिए । अब वार्षिक १ सय जनासम्म कामदार पठाउने म्यानपावर कम्पनीले एक पटक वा पटक पटक गरि २५ हजार अमेरिकी डलरसम्म यस्तो सटही सुविधा पाउनेछन् ।
यस्तै, वार्षिक १ सय जनाभन्दा बढी कामदार पठाउने म्यानपावर कम्पनीले यसअघि वार्षिक एकपटक वा पटक पटक गरि २० हजार डलर सम्मको सटही सुविधा पाउँदै आएकोमा अब यसको सीमा बढाएर एक पटक वा पटक पटक गरि वार्षिक ३० हजार डलर पुर्याइएको छ ।
