उपप्रधान एवं शहरी विकासमन्त्री प्रकाशमान सिंहले निर्माण व्यवसायीहरुले भूक्तानी पाउन बाँकी पैसा दिलाउने आश्वासन दिएका छन् । मन्त्री सिंहलाई बधाई दिन पुगेको निर्माण व्यवसायी महासंघको प्रतिनिधिमण्डलसँग उपप्रधानमन्त्री सिंहले निर्माण व्यवसायीका जायज मागप्रति सरकार सकारात्मक रहेको बताउँदै पाउन बाँकी भूक्तानी दिलाउन प्रयत्न गर्ने आश्वासन दिएका हुन् ।
मन्त्री सिंहले नेपाल निर्माण व्यवसायी महासंघमार्फत देशैभरका निर्माण व्यवसायीहरुलाई आफूले जिम्मा लिएका आयोजनाहरू समयमै सम्पन्न गर्ने गरी काम गर्न आग्रह पनि गरेका छन् ।
‘निर्माण व्यवसायीहरूले राखेका माग सम्बोधन गर्न सरकार सकारात्मक छ, अब लामो कुरा गर्ने भन्दा पनि काम गरेर देखाउने समय छ, हामीले यसतर्फ लाग्नुपर्ने हुन्छ’ उनले भने ।
उपप्रधानमन्त्री सिंहलाई बधाई दिँदै निर्माण व्यवसायी महासंघका अध्यक्ष रवि सिंहले निर्माण व्यवसायीले भोगिरहेका भूक्तानीदेखि सार्वजनिक खरिद ऐनमा गर्नुपर्ने संशोधनको विषयमा ध्यानाकर्षण गराएका थिए ।
