बुद्ध एयरले यस वर्षको भ्यालेन्टाइन डेलाई लक्षित गर्दै आफ्ना ग्राहकहरूका लागि भ्यालेन्टाइन अफर सार्वजनिक गरेको छ ।
हरेक वर्ष फेब्रुअरी १४ मा मनाइने प्रेम दिवसलाई अविस्मरणीय बनाउन बुद्ध एयरले ‘एभरेष्ट एक्सपेरियन्स’ उडानमा एकै टिकटमा दुई जना उड्न मिल्ने योजना ल्याएको हो । यस योजना अन्तर्गत जोडीहरूले १४ हजार २६५ रुपैयाँमा सगरमाथालगायतका विभिन्न हिमशृङ्खलाहरूको अवलोकन गर्न पाउनेछन् ।
काठमाडौं विमानस्थलबाट सुरु भई करिब १ घण्टाको हिमाली दृश्यावलोकनपछि जहाज पुनः काठमाडौंमै अवतरण हुनेछ । उडानमा सहभागी जोडीहरूलाई गुलाबको फूल, चकलेटलगायत उपहार प्रदान गरिनेछ ।
बुद्ध एयरले विगतका वर्षहरूमा जस्तै यस वर्ष पनि प्रेमिल जोडीहरूलाई हिमालको काखमा माया साटासाट गर्ने अवसर प्रदान गर्न यो प्याकेज ल्याएको जनाएको छ ।
यस अफरका सिटहरू सीमित भएकाले इच्छुक यात्रुहरूले समयमै आफ्नो टिकट सुरक्षित गर्न बुद्ध एयरले अनुरोध गरेको छ । टिकट बुकिङका लागि बुद्ध एयरको आधिकारिक वेबसाइट, मोबाइल एप वा नजिकैको सेल्स काउन्टरमा सम्पर्क गर्न सकिनेछ ।
