नयाँ सरकार गठन भएको दिन शेयर बजार परिसूचक नेप्से दोहोरो अंकले घटेपनि कारोबार रकम भने बढेको छ। आज नेप्से सूचक १७.१८ अंकले घटेर २२४०.४१ को बिन्दुमा पुगेर रोकिएको छ ।
आज कारोबारमा आएका ३२२ कम्पनीका २ करोड ५० लाख ७९ हजार ७९ कित्ता शेयर खरिद बिक्रीबाट ८ अर्ब ७३ करोड १४ लाख ३६ हजार ३७ रुपैयाँ १५ पैसाको कारोबार भएको छ । जस मध्ये अप्पर तामाकोशी हाइड्रोपावरको ३७ करोड ८ लाखको कारोबार भएको छ भने निफ्राको २१ करोड ९८ लाखको कारोबार भएको छ । त्यस्तै जानकी फाइनान्सको १९ करोड १५ लाखको कारोबार भएको छ ।
आज सिभिल बैंकको ऋणपत्रको मूल्य १० प्रतिशतले बढेको छ भने मान्डु हाइड्रोको शेयर मूल्य ९.९९ प्रतिशत बढेको छ ।
आज जानकी फाइनान्सको शेयर मूल्य सर्वाधिक १० प्रतिशत घटेको छ भने एनआईसी एसिया बैंकको ऋणपत्रको मूल्य ६.९४ प्रतिशत घटेको छ ।
आज कारोबारमा आएका समूहगत सूचक मध्ये हाइड्रोपावर, इन्भेष्टमेन्ट, उत्पादन तथा प्रशोधन र म्युचुअल फण्ड बाहेकका सबै समूहगत सूचक घटेका छन् । जस मध्ये विकास बैंक समुह सर्वाधिक १.८९ प्रतिशत घटेको छ। आज लगानी समुह सर्वाधिक १.७० प्रतिशत बढेको छ ।
आज नै प्रधानमन्त्री केपी शर्मा ओलीको नेतृत्वमा नयाँ सरकार गठन भएको छ । नेकपा एमाले, कांग्रेस र जसपा मिलेर नयाँ सरकार गठन गरेका हुन् । ओलीले २२ सदस्यीय मन्त्रिपरिषद् गठन गरेका छन् । जसमा एमाले उपाध्यक्ष विष्णु पौडेलले उपप्रधान सहित अर्थ मन्त्रालयको नेतृत्व सम्हाल्ने छन् । पौडेल शेयरबजारले रुचाएको अर्थमन्त्रीको रुपमा चिनिने गरेका छन् । तर यस पटक भने उनले सपथ लिएकै दिन बजारमा दोहोरो अंकले घटेको छ । यद्यपि विष्णु पौडेल अर्थ मन्त्रालयमा आउने चर्चा पहिलेदेखि नै रहेकोले त्यसको कारणले पहिले नै बजार बढिसकेको र लगानीकर्ताले प्रफिट बुक गर्न खोज्दा आज बजार घटेको हुन सक्ने जानकारहरु बताउछन् ।
