शिक्षा, विज्ञान तथा प्रविधि मन्त्री महावीर पुनले सबै विश्वविद्यालयहरुलाई ३ महिनाभित्र अनिवार्य परीक्षाको नतिजा प्रकाशन गर्न निर्देशन दिएका छन् । मन्त्रालयमा आज यसबारे छलफल गरेपछि उनले यस्तो निर्देशन दिएका हुन् ।
मन्त्री पुनका अनुसार केही विश्वविद्यालयले परीक्षा लिएर परीक्षाफल निकाल्न ८ महिनादेखि १ बर्ष सम्म लगाएको भेटिएको छ। यसले विद्यार्थीलाई अपुरणिय क्षति हुने भएकोले उनले सबै विश्वविद्यालयलाई बढीमा ३ महिना भित्र अनिवार्य रूपमा परीक्षाफल निकाल्न निर्देशन दिएका हुन् । राष्ट्रिय परीक्षा बोर्डले १२ कक्षाको ५ लाख विद्यार्थीको परीक्षाफल ३ महिना भित्रै निकाल्ने गरेको उनले स्मरण गराएका छन्। समयमा मै परीक्षाफल ननिकाल्ने विश्वविद्यालयहरुको अनुदान रोक्का हुने मन्त्री पुनले जनाएका छन्।
त्यस्तै मन्त्री पुनले नेपाल भरका सामुदायिक माध्यमिक विद्यालयमा पढ्ने विद्यार्थीहरु कम्प्युटर शिक्षा बाट बञ्चित नहुन् भन्ने उद्देश्यले पठनपाठनको लागि हरेक विद्यालयमा एक जना कम्प्युटर शिक्षकको दरबन्दी अनिवार्य थप्न निर्देशन दिएका छन्।
त्यस्तै त्रिभुवन विश्वविद्यालय किर्तिपुरको हाता भित्र ठुलो क्षेत्रफलमा रहेको झाडी फाँडेर (ठुला रुखहरु नकाट्ने) सफा गरि सुन्दर बँगैचा सहित फुटपाथ बनाएर विश्वविद्यालयलाई आकर्षक बनाउन उनले निर्देशन दिएका छन्।
