नवनियुक्त भौतिक पूर्वाधार तथा यातायातमन्त्री कुलमान घिसिङले मुलुकलाई अब विद्युतीय सवारी साधन (ईभी)को युगमा पु¥याउने घोषणा गरे । सोमबार पदभार ग्रहण गर्दै ऊर्जा मन्त्रीसमेत रहेका घिसिङले मुलुकलाई अब ईभीको युगमा लैजाने उद्घोष गरेका हुन् ।
उनले ईभी प्रवद्र्धन गर्ने क्रममा देखिने चुनौती समाधान गर्ने उपाय पहिल्याउन ५ सदस्यीय अध्ययन कार्यदल बनाउने निर्णय पनि गरिसकेका छन् । मन्त्रालयका पूर्वाधार निर्माण तथा यातायात महाशाखा प्रमुखको संयोजकत्वमा यातायात व्यवस्था विभागका महानिर्देशक, मन्त्रालयका कानुन उपसचिव, आन्तरिक व्यवस्थापन शाखाका उपसचिव र मेकानिक तर्फका सिनियर डिभिजनल इन्जिनियर सदस्य रहेको समिति बनाएका हुन् ।
कार्यदललाई ईभीको अहिलेको स्थिति, हालका कानुनी प्रावधान र सुधार गर्नुपर्ने विषयबारे अध्ययन गरे प्रतिवेदन पेश गर्ने कार्यादेश छ । यहीँ कार्यदलले ईभीको गुणस्तर र मापदण्ड समेत सिफारिस गर्ने छ ।
‘हामीसँग पर्याप्त विद्युत छ । त्यसमा केही प्राविधिक र म्यानेजरियल समस्या होलान् । तर, ति समस्या समाधान गर्दै पेट्रोल, डिजेल र ग्यासको इम्पोर्ट घटाउँदै लैजानुपर्छ’ कुलमानले भने, ‘अब इन्धन सवारीलाई पनि क्रमशः विद्युतीयमा रूपान्तरण गर्दै आयात खर्च घटाउने र वातावरणमैत्री भविष्य बनाउने समय आएको छ यसले विद्युतको खपत बढ्छ । क्लाइमेट चेन्जमा पनि ठूलो इम्प्याक्ट ल्याउँछ ।’
कुलमान घिसिङको यस्तो उद्घोषले ईभी व्यवसायी मात्रै नभई प्रयोगकर्ता पनि हौसिएका छन् । लामो समयदेखि ईभी चढिरहेका र ईभीलाई प्रोत्साहन गरिरहेका किशु झाले नवनियुक्त भौतिक पूर्वाधार तथा यातायातमन्त्री कुलमान घिसिङले देशलाई विद्युतीय सवारी साधनको युगमा लैजाने घोषणा गर्नुले ईभी कम्युनिटीलाई अझ बलियो बनाउने विश्वास व्यक्त गरेका छन् ।
‘यो कदमले हाम्रो भ्ख् कम्युनिटीलाई अझ बलियो बनाउनेमा हामी सबै आशावादी छौं’ उनले भनेका छन् ।
आन्दोलनका क्रममा आगजनी, तोडफोड र शोरुम जलेपछि निराश बनेका व्यवसायीहरु पनि मन्त्री घिसिङको घोषणाले केही आशावादी देखिएका छन् । कार्यदलले चाँडै अध्ययन गरेर प्रतिवेदन बुझाउने र त्यस पश्चात उक्त प्रतिवेदनका आधारमा मन्त्रालयले आवश्यक निर्णय लिने अपेक्षामा व्यवसायीहरु देखिएका छन् ।
‘हिजो विद्युत प्राधिकरणमा बस्दा पनि प्राधिकरणका लागि विद्युतीय गाडी नै खरिद गर्ने कामको सुरुवात उहाँले नै गर्नुभएको हो, प्राधिकरणको हाताभित्र र देशब्यापी रुपमै चार्जिङ स्टेशन निर्माणमा समेत उहाँले नै योजना बनाउनु भएको थियो’ एक जना व्यवसायी भन्छन्, ‘अब मन्त्री नै भएर आएपछि पक्कै पनि केही नयाँ र राम्रो कामको सुरुवात होला भन्ने लागेको छ । उहाँले पहिलो निर्णयबाटै त्यसको संकेत गरिसक्नु भएको छ । हामी आशावादी पनि छौँ ।’
