वाणिज्य, आपूर्ति तथा उपभोक्ता हित संरक्षण विभागले ५ वटा कन्सल्टेन्सीलाई जरिवाना गरेको छ । वाणिज्य विभागले बजार अनुगमनका क्रममा कैफियत भेटिएको भन्दै ५ वटा कन्सल्टेन्सीलाई कारबाही गरेको हो ।
जस अनुसार काठमाडौँ ३१ मा रहेको एडु हब ग्लोबल नेपाल प्रा.लि.लाई १ लाख जरिवाना तोक्दै ३ दिनभित्र व्यवसायसँग सम्बन्धित सम्पूर्ण कागजात लिएर उपस्थित हुन निर्देशन दिइएको छ ।
यस्तै, काठमाडौँ महानगरपालिका वडा नम्बर २८ मा रहेको स्टुडेन्ट एब्रोड स्टडी सेन्टर प्रा.लि.लाई ७५ हजार जरिवाना तिराइएको छ । उसलाई भने कागजात लिएर आउन भनिएको छैन ।
काठमाडौँ १६ मा रहेको ग्यालेक्सी ग्लोबल इन्टरनेशनल कन्सल्टेन्सी प्रा.लि.लाई ५५ हजार जरिवाना गरिएको छ । साथै, सबै कागजात लिएर ३ दिनभित्र विभागमा उपस्थित हुन पनि भनिएको छ ।
काठमाडौँ महानरपालिका वडा नम्बर १० स्थित ओएसिस करियर एड्भाइजर प्रा.लि. लाई पनि विभागले ५१ हजार नगद जरिवाना तोकेको छ । यस्तै काठमाडौँ १६ कै रिङगो जापनिज ल्याङवेज एकेडेमी प्रा.लि.लाई पनि समान ५१ हजार नै जरिवाना गरिएको विभागले जनाएको छ ।
यी सबै कन्सल्टेन्सीले उपभोक्ता संरक्षण ऐन २०७५ को दफा ३८ (ट) बमोजिमको कसुर गरेको विभागको भनाइ छ ।
