सरकारले लघु, घरेलु तथा साना उद्योग प्रवर्द्धन नीति २०८२ कार्यान्वयनमा ल्याएको छ । उद्योग, वाणिज्य तथा आपूर्ति मन्त्रालयले लघु, घरेलु तथा साना उद्योग प्रवर्द्धन नीति २०८२ कार्यान्वयनमा ल्याएको हो ।
लघु, घरेलु तथा साना उद्योगलाई ठूला तथा मझौला उद्योगको आपूर्ति श्रृंखलासँग जोड्ने उद्देश्यले यो नीति कार्यान्वयनमा ल्याइएको मन्त्रालयले जनाएको छ । सानो र छरिएको पूँजीबाट सञ्चालित लघु, घरेलु तथा साना उद्योगको आपूर्ति चक्रलाई मझौला तथा ठूला उद्योगसँग जोड्ने रणनीति अनुरुप यस्तो नीति ल्याइएको मन्त्रालयले बताएको छ ।
हाल मुलुकको कुल अर्थतन्त्रमा उद्योग क्षेत्रको योगदान १३ प्रतिशत रहेको छ । तर, यसमा साना र लघु घरेलु योगदान कति छ भन्ने यकिन तथ्यांक छैन । अब उक्त नीति अनुसार माध्यमिक तथा उच्च शिक्षा तहको पाठ्यक्रममा उद्यमशीलता विषय समावेश गरिएको छ ।
साना उद्योगका उत्पादनको बजार प्रवर्द्धनका लागि निजी क्षेत्र, सहकारी र स्थानीय तहको सहभागितामा विभिन्न स्थानमा विक्री केन्द्र, कोसेली घर, उद्यम घर, सामुदायिक र साझा सुविधा केन्द्र स्थापना र विकास गर्ने नीति मन्त्रालयको छ ।
शैक्षिक प्रमाणपत्र धितोमा राखेर सहुलियतपूर्ण व्याजदरमा ऋण प्रवाह गर्ने विषय पनि नीतिमा समावेश गरिएको छ ।
