उद्योगीहरुले सिमेन्टको मूल्य घटाएका छन् । निर्माणको सिजनमै सिमेन्टको मूल्य अचाक्ली बढाइएको भन्ने गुनासो आएपछि सिमेन्ट उत्पादक संघले साउनको तुलनामा अधिकतम् ११५ रुपैयाँ मात्रै मूल्य बढाएर बिक्री मूल्य कायम गर्न आफ्ना सदस्य उद्योगहरुलाई पत्राचार गरेको हो ।
पत्रकार सम्मेलन गरि सिमेन्ट उत्पादक संघले २०८१ साउन महिनाको बिक्री मूल्यमा भौगोलिक र ब्यापारिक अवस्था समेतलाई हेरी औसतमा प्रतिबोरा (५० किलोग्राम)को अधिकतम् बिक्री मूल्य ११५ रुपैयाँभन्दा थप नहुने गरि बिक्री मूल्य निर्धारण गर्न सबै सदस्य उद्योगहरुलाई पत्राचार गरिएको जानकारी दिएको हो ।
‘कुनै पनि उद्योगले उत्पादित वस्तुको मूल्य आफ्नो लागत आदिको आधारमा आफैँ निर्धारण गर्ने कानुनी व्यवस्था र अधिकार भएपनि हालको अवस्थालाई हृदयंगम गरि आफ्नो सिमेन्टको मूल्यमा यस संघले गरेको पत्राचार अनुसार बिक्री वितरण गर्ने व्यवस्था मिति २०८१/१०/१२ बाटै मिलाउनु भई सिमेन्टको हालको बिक्री मूल्य समायोजन गरी सदस्य उद्योगहरुको तर्फबाट सहयोग गरिदिनु हुनेछ भन्ने आशा एवम् विश्वास लिएका छौँ’ संघको विज्ञप्तिमा भनिएको छ ।
संघले ६५ सिमेन्ट उद्योगमध्ये २२ वटा उद्योग पूर्ण रुपमा बन्द भइसकेको र नोक्सानी ब्यहोरेरै चलिरहेका थप उद्योगहरुसमेत आर्थिक संकटका कारण बन्द उन्मुख रहेको समेत संघले जनाएको छ । तर, उद्योगहरुले कार्टेलिङ र एकाधिकार कायम गरेर मूल्य बढाए भन्ने आरोपमा सत्यता नरहेको संघका अध्यक्ष रघुनन्दन मारुले दाबी गरेका छन् ।
संघको आग्रह अनुसार अब सिमेन्ट उद्योगहरुले नयाँ मूल्य निर्धारण गरेमा सिमेन्टको भाउ प्रतिबोरा ५२५ देखि ५३० रुपैयाँसम्म कायम हुने गरिएको छ ।
