नेपाल चेम्बर अफ कमर्सका निवर्तमान अध्यक्ष राजेन्द्र मल्लले उधारो कारोबार निस्तेज पार्न नीतिगत प्रबन्ध हुनुपर्ने बताएका छन् । नेपाल आर्थिक पत्रकार संघ (नाफिज)को नवनिर्वाचित कार्यसमितिलाई चेम्बरमा स्वागत गर्ने कार्यक्रममा निवर्तमान अध्यक्ष मल्लले उधारो कारोबारलाई निरुत्साहित गर्दै निस्तेज नै गर्नुपर्ने बताएका हुन् ।
उनले मुलुकमा ‘मोर इकोनोमिक’ बहस हुनुपर्नेमा ‘मोर पोलिटिक्स’ भइरहेको भन्दै असन्तुष्टि समेत जनाए । कोभिड अगाडी औसतमा ६.५ प्रतिशतदेखि ७ प्रतिशतको हाराहारीमा आर्थिक वृद्धिदर रहेको भएपनि त्यसयता मुलुकको आर्थिक वृद्धिदर निकै ओरालो लागिरहेको निवर्तमान अध्यक्ष मल्लको भनाइ छ ।
रियलस्टेट कर्जामा ‘लोन टू भ्यालू रेसियो’ भूगोल अनुसार ५० देखि ६० प्रतिशत रहेको तर, अटोमोबाइल्समा ८० प्रतिशतसम्म रहेको भन्दै उनले यो व्यवहारिक नरहेको तर्क गरे ।
‘राष्ट्र बैंकले रियलस्टेटको लोन टू भ्यालू रेसियो ५० देखि ६० प्रतिशतसम्म कायम रहेको छ, जबकी अटो लोनमा ८० प्रतिशतसम्म छ’ निवर्तमान अध्यक्ष मल्लले भने, ‘घरजग्गामा पनि कम्तीमा अटोमोबाइल्स सरह हुनुपर्छ ।’
यस्तै, कुनै कम्पनीको सञ्चालक पदमा बसेको व्यक्तिले पदबाट राजीनामा दिएको १ वर्षसम्म सेयर बिक्री गर्न नपाउने प्रावधान पनि अव्यवहारिक रहेको उनको भनाइ छ । यसकारण प्रत्यक्ष वैदेशिक लगानीसमेत बढ्न नसकेको मल्लको दाबी छ ।
