चालु आर्थिक वर्षको ५ महिनामा नेपालको वैदेशिक ब्यापारमा निर्यातको हिस्सामा उल्लेख्य सुधार आएको छ । भन्सार विभागका अनुसार चालु आर्थिक वर्षको ५ महिना (साउनदेखि मंसिरसम्म)मा निर्यात १६.५४ प्रतिशतले बढ्दा आयात ३ प्रतिशतले बढेको छ ।
गत आर्थिक वर्षको यहीँ अवधिमा ६३ अर्ब २० करोड ७४ लाख ३५ हजार बराबरको वस्तु तथा सेवा नेपालबाट बाह्य मुलुकमा निर्यात भएकोमा चालु आर्थिक वर्षको सोही अवधिमा ७३ अर्ब ६५ करोड ९७ लाख ७१ हजार बराबरको वस्तु तथा सेवा निकासी भएको छ ।
यस्तै, गत आर्थिक वर्षको ५ पहिलो ५ महिनामा ६ खर्ब ४२ अर्ब २० करोड ८९ लाख ६४ हजार बराबरको वस्तु तथा सेवा आयात भएकोमा यस वर्षको सोही अवधिमा ६ खर्ब ६१ अर्ब ४८ करोड ८५ लाख ९४ हजारको वस्तु तथा सेवा आयात भएको छ ।
भन्सार विभागका अनुसार चालु आर्थिक वर्षको मंसिर मसान्तसम्म वैदेशिक ब्यापार घाटा १.५२ प्रतिशतले बढेर ५ खर्ब ८७ अर्ब ८२ करोड ८८ लाख २२ हजार रुपैयाँ पुगेको छ । गत आर्थिक वर्षको यो अवधिमा नेपालको वैदेशिक ब्यापार घाटा ५ खर्ब ७९ अर्ब १५ लाख २९ हजार रुपैयाँ थियो ।
