प्रधानमन्त्री पुष्पकमल दाहाल प्रचण्ड पदमुक्त भएका छन् । प्रतिनिधिसभाबाट विश्वासको मत नपाएपछि उनी स्वत: पदमुक्त भएका हुन् ।
प्रधानमन्त्रीले विश्वासको मत पाउँ भनि राखेको प्रस्तावको पक्षमा ६३ मत आएको छ भने विपक्षमा १९४ मत आएको छ। त्यस्तै तटस्थमा १ मत परेको छ । आज संसदमा २५८ जना सांसद उपस्थिति थिए ।
२७५ सदस्यीय प्रतिनिधिसभामा विश्वास प्राप्त गर्नका लागि १३८ मत चाहिनेमा प्रचण्डले त्यो भन्दा कम मत पाएपछि उनी स्वत: पदमुक्त भएका हुन् ।
उनले सरकारको नेतृत्व गरेको १८ महिनाको अवधिमा पाँचौं पटक संसदबाट विश्वासको मत माग्नु परेको हो । यसअघि ४ पटक विश्वासको मत पाएका उनी पाँचौ पटकमा भने विश्वासको मत पाउन असफल भए ।
कांग्रेस र एमालेले सत्ता साझेदारीका लागि सात बुँदे सहमति गरेर एमाले लगायतका दलले सरकारलाई दिएको समर्थन फिर्ता लिएपछि प्रधानमन्त्रीले विश्वासको मत लिएका हुन् । संविधानको धारा १०० (२) मा ‘प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा ३० दिनभित्र प्रधानमन्त्रीले विश्वासको मतका लागि प्रतिनिधिसभासमक्ष प्रस्ताव राख्नुपर्नेछ’ भन्ने व्यवस्था छ ।
विश्वासको मत नपाएर प्रचण्ड स्वत: पदमुक्त भएपछि अब नयाँ सरकार गठनको प्रक्रिया अघि बढ्ने छ । केपी शर्मा ओलीलाई प्रधानमन्त्री बनाउने गरि आज नै कांग्रेस र एमालेले नयाँ सरकारको लागि दाबी पेश गर्ने तयारी गरेका छन् ।
