नेपाल उद्योग वाणिज्य महासंघका अध्यक्ष चन्द्र ढकालले आगामी मौद्रिक नीति निजी क्षेत्रको लागि सञ्जीवनी बुटी बनेर आउने विश्वास व्यक्त गरेको छन् । नेपाल राष्ट्र बैंकले सार्वजनिक गर्ने आर्थिक वर्ष २०८१/८२ को मौद्रिक नितीको लागि सुझाव दिन महासंघले आयोजना गरेको अन्तरक्रिया कार्यक्रममा अध्यक्ष ढकालले आगामी मौद्रिक नीतिबाट निजी क्षेत्र आशावादी रहेको बताएका हुन् ।
उद्योगी व्यवसायीमा निराशा रहेकोले अहिले देखिएका विभिन्न समस्या मौद्रिक नीतिले त्यसको सम्बोधन गर्नु पर्ने उनले बताए। सहकारी र लघुवित्तमा समस्या आउँदा गाउँ गाउँमा कर्जा विस्तार रोकिएकोले पनि मौद्रिक नीतिले सम्बोधन गर्नुपर्ने उनको भनाई छ ।
अर्थतन्त्रको समस्या सहज रुपमा अवतरण गर्नुपर्ने भएकोले हुन सक्ने सम्मको लचकता मौद्रिक नीतिले अपनाओस् भन्ने महासंघको चाहना रहेको उनले बताए । उनले भने ‘महँगी बढिरहेको छ, सर्वसाधारणको क्रयशक्ति बढ्न सकेको छैन
लगानी बढ्न नसकेकोकाले नयाँ रोजगारी सिर्जना हुन सकेको छैन, रेमिटेन्स बढेको भए पनि त्यो पैसा बैंकमा थुप्रिएकोछ, उद्योगहरु ३०/४० प्रतिशतमा चलेका छन्, यी समस्याको समाधान हुनु पर्छ’।
उनले उत्पादनमूलक उद्योगमा ब्याजको लागि केही सहुलियत हुनु पर्ने बताए । अर्थतन्त्र चलायमान बनाउन सक्ने गरि बजेट नआएकोले अब उद्योगी व्यवसायीले मौद्रिक नीतिमा अपेक्षा गरेकोले बजारमा माग सिर्जना गर्न नीतिगत सहजीकरण हुन आवश्यक रहेको उनको भनाई छ ।
