आइतबार मध्यराति युरो कप २०२४ को फाइनल खेल हुँदैछ भने सोमबार बिहान कोपा अमेरिका २०२४ को फाइनल खेल हुँदैछ । यी दुई ठूला प्रतियोगिताका फाइनल खेलअघि स्पेनका युवा खेलाडी लामिने यामलले कोपा अमेरिकाको फाइनल खेलबारे बोल्दै अर्जेन्टिनालाई जितका लागि शुभकामना दिएका छन् ।
अर्जेन्टिनाले ले सोमबार बिहान कोपा अमरिकाको फाइनलमा कोलम्बियाको सामना गर्दैछ । त्यसअघि यामलको टिम स्पेनले युरो कपको फाइनलमा इंग्ल्यान्डको सामना गर्दैछ । जारी युरो कपमा उत्कृष्ट प्रदर्शन गरिरहेका यामलले कोपा अमेरिका मेस्सीको टिमले जितोस् भन्ने चाहेका छन् ।
यामलले आफूले स्पेनका साथमा युरो कप जित्दै गर्दा मेस्सीले अर्जेन्टिनाका साथमा कोपा अमेरिका जितेको हेर्ने रहर भएको बताएका छन् । यदि यी दुई टिमले फाइनल जिते भने यसै वर्ष दुई महादेशका च्याम्पियन टिमबीच सुपर कप प्रतियोगीतामा आमनेसामने हुनेछन् । यदि स्पेनले युरो जितेको खण्डमा यामल सुपर कपको फाइनलमा मेस्सी र उनको टिमविरुद्ध खेल्नेछन् ।
‘मलाई विश्वास छ, मैले स्पेनका साथमा युरो जित्नेछु, त्यसपछि मेस्सी र अर्जेन्टिनाले कोपा अमेरिका जितून्’ यामलले भने, ‘यदि कोपा अमेरिका अर्टेन्टिनाले जितेमा म सुपर कपको फाइनलमा मेस्सी र उनको टिमविरुद्ध खेल्न पाउनेछु । यदि त्यसो भयो भने त्यो मेरा लागि अद्भुत क्षण हुनेछ, म मेस्सी र अर्जेन्टिनालाई कोपाको फाइनलका लागि गुड लक भन्न चाहन्छु ।’
यामल मेस्सीलाई आइडल मान्छन् । यामल ६ महिनाको हुँदा मेस्सीले उनलाई बोकेर नुहाउँदै गरेका तस्बिर यतिबेला सामाजिक सन्जालमा छाइरहेका छन् ।
