प्रधानमन्त्री पुष्पकमल दाहालले संसदबाट विश्वासको मत प्राप्त गर्न नसकेसँगै राष्ट्रपति रामचन्द्र पौडेलले कानुनविदहरुसँग छलफल गरेका छन् । उनले नयाँ सरकार गठनको प्रक्रियाका सन्दर्भमा कानुनविदहरुसँग छलफल गरेका हुन् ।
छलफलका लागि शितलनिवास निम्त्याइएका ८ जना कानुनविदहरुमध्ये ७ जनाले संविधानको ७६ (२) अनुसार सरकार गठन प्रक्रिया अघि बढाउन राष्ट्रपतिलाई सुझाव दिएका छन् ।
वरिष्ठ अधिवक्ता चन्द्रकान्त ज्ञवालीका अनुसार छलफलका लागि बोलाइएका सबैजसो कानुनविदले संविधानको धारा ७६ (२) अनुसार नयाँ सरकार गठनको प्रक्रिया अघि बढाउन राष्ट्रपतिलाई सुझाव दिएका छन् ।
वरिष्ठ अधिवक्ता चन्द्रकान्त ज्ञवालीले मात्रै धारा ७६(२) अनुसार गठन भएको सरकारले विश्वासको मत नपाएकाले अब धारा ७६(३) अनुसार प्रक्रिया अघि बढाउन उचित हुने सुझाव दिएका छन् ।
अर्का कानुनविद एवम् कानुनका प्राध्यापक डा. विपिन अधिकारीले राष्ट्रपतिले संविधानको कुनै धारा उल्लेख नगरि पनि सरकार गठनका लागि आह्वान गर्न सक्ने सुझाव दिएका छन् ।
अन्य कानुनविदहरु नेपाल बार एसोसिएसनका अध्यक्ष गोपालकृष्ण घिमिरे, पूर्णमान शाक्य, विपिन अधिकारी, हरिहर दाहाल, शेरबहादुर केसी, टिकाराम भट्टराई, र सीताराम केसीले धारा ७६(२) अनुसार नै सरकार गठन गर्न सुझाव दिएका छन् ।
