उत्कृष्ट लयमा रहेको कोलम्बिया अमेरिकामा जारी कोपा अमेरिका फुटबल २०२४ को फाइनलमा प्रवेश गरेको छ । बिहीबार बिहान भएको दोस्रो सेमिफाइनल खेलमा कोलम्बियाले बलियो टोली उरुग्वेलाई १–० ले हराउँदै फाइनलमा स्थान बनाएको हो ।
पहिलो हाफमै १० खेलाडीमा सिमित भएको कोलम्बियाले यसका बाबजुद पनि प्रमुख उपाधि दाबेदार उरुग्वेको यात्रा सेमिफाइनलमै रोकिदिएको हो ।
कोलम्बियाका लागि खेलको ३९औं मिनेटमा जेफर्सन लेर्माले गोल गरेर अग्रता दिलाएका थिए । उनको गोलमा कप्तान हामेस रोड्रिग्वेजले असिस्ट गरेका थिए । गोल गरेको ६ मिनेटमै कोलम्बिया १० खेलाडीमा सिमित भयो । डिफेन्डर ड्यानिएल मुनोज दोहोरो पहेँलो कार्ड पाउँदै मैदान छाड्न बाध्य भए । यसपछि कोलम्बिया १० खेलाडीमा डाउन भएको थियो ।
कोलम्बियासँग एक खेलाडी कम भएपनि उरुग्वेले गोल फर्काउन नसक्दा यसको यात्रा सेमिफाइनलमै समाप्त हुन पुग्यो ।
कोलम्बियाले अब कोपाको उपाधिका लागि साबिक च्याम्पियन अर्जेन्टिनाको सामना गर्नेछ ।
