शिखर पावर डेभलपमेन्ट लिमिटेडले सर्वसाधारण लगानीकर्ताका लागि प्राथमिक सार्वजनिक निष्काशन (आईपीओ) खुला गरेको छ । कम्पनीको आईपीओमा फागुन १७ गते आइतबारदेखि फागुन २२ गतेसम्म आवेदन दिन सकिनेछ ।
कम्पनीले यसअघि आयोजना प्रभावित क्षेत्रका स्थानीय र वैदेशिक रोजगारीमा रहेका नेपालीहरुका लागि निष्काशन गरेको आईपीओ बाँडफाँड गरिसकेको छ ।
कम्पनीले धितोपत्र बोर्डबाट जारी पूँजी ९८ करोडको ३२.६५ प्रतिशत अर्थात् ३२ करोड रुपैयाँ बराबरको ३२ लाख कित्ता शेयर निष्काशन गर्ने अनुमति पाएको थियो । यसमध्ये कम्पनीले ९ लाख ८० हजार कित्ता शेयर आयोजना प्रभावित क्षेत्रका स्थानीयहरुका लागि, २ लाख २२ हजार कित्ता शेयर वैदेशिक रोजगारीमा रहेका नेपालीहरुका लागि र १ लाख ११ हजार कित्ता शेयर सामूहिक लगानी कोषहरुका लागि निष्काशन गरी बाँडफाँड गरिसकेको छ ।
यसपछि अब कम्पनीले प्रतिकित्ता १०० रुपैयाँ अंकित दरका १८ करोड ४२ लाख ६० हजार रुपैयाँ बराबरका १८ लाख ४२ हजार ६ सय कित्ता शेयर सर्वसाधारण लगानीकर्ताहरुका लागि निष्काशन खुला गरेको हो ।
कम्पनीको आईपीओमा न्यूनतम् १० कित्ता र अधिकतम् १० हजार कित्ताका लागि आवेदन दिन सकिनेछ ।
कम्पनीले सञ्चालन गरेको ४.९६ मेगावाटको भिमखोला साना जलविद्युत आयोजनाबाट २०८१ फागुन २५ देखि व्यवसायिक उत्पादन भइरहेको छ ।
कम्पनीको शेयर निष्काशन तथा बिक्री प्रबन्धकमा ग्लोबल आइएमई क्यापिटल लिमिटेड रहेको छ ।
