उच्चस्तरीय आर्थिक सुधार सुझाव आयोगका लागि सरकारले फागुनमा मात्रै पौने झण्डै १ करोड ७० लाख रकमान्तर गरेको छ । अर्थ मन्त्रालयका अनुसार पूर्वसचिव रामेश्वर खनाल नेतृत्वको उच्चस्तरीय आर्थिक सुधार सुझाव आयोगलाई १ करोड ६८ लाख ८३ हजार रुपैयाँ निकासा दिइएको हो । यो रकम अर्थले फागुन महिनामा गरेको रकमान्तरको मात्रै हिसाब हो ।
असोज २१ गते गठित उक्त आयोगलाई अर्थले २ शीर्षकमा निकासा दिएको हो । जसअनुसार, आयोगको काममा खटिने कर्मचारीलाई प्रोत्साहन भत्ताबापत थप १ करोड ५७ लाख ८ हजार रकमान्तर गरी निकासा गरेको अर्थ मन्त्रालयले खाना र खाजाका लागि ११ लाख ७५ हजार निकासा दिएको छ ।
आयोगलाई सहयोग गर्ने कर्मचारीलाई प्रोत्साहन भत्ता, सचिवालय सञ्चालन र कार्यालय समयको अतिरिक्त समयमा काम गरेबापत अर्थ मन्त्रालयका कर्मचारीलाई खाना र खाजाका लागि भनेर अर्थले ११ लाख ७५ हजार रुपैयाँ थप निकासा दिएको हो ।
यद्यपी, यो आयोगका लागि कुल कति रकम दिइयो भन्ने विवरण भने सार्वजनिक गरिएको छैन ।
खनाल आयोगले चैत २९ गते अर्थमन्त्री विष्णु पौडेललाई प्रतिवेदन बुझाएको थियो ।
